Bibi Chemnitz Tokyomi saqqummersitsivoq

Atisanik ilusilersuisartoq Bibi Chemnitz atisanik katersanik siullermeerluni Europap avataani saqqummersitsivoq, tassa Japanimi. Tamanna Tokyo Fashion Weekimut atatillugu pivoq, tassani inimik saqqummersitsiveqarluni. Sivisuumik angalalluni saqqummersitsisaqattaarneq tassani naggaserneqarpoq.

- Aappaagu ukiukkut saqqummertussat takutinneqarneri kingulliit ingerlappagut, taakku saqqummersitagut aggustimi/septembarimi pisiniarfinniilertussaapput, Bibi Chemnitz Sermitsiaq.AG-mut taama oqarpoq.

- Maanna aamma Japanimi saqqummersitseriaratta saqqummersitseqattaarnerput sivisuvoq, uku atisat katersat januaarip qeqqani Parisimi saqqummersillugit aallartippagut, tulliani Københavnimi februaarimi, maanilu Japanimi marsimi.

- Asia saqqummersitsivik kingulliuvoq, taamaalilluni atisat katersat tunisassiarineqarnissaannut piffissaliussaq angumerissagatsigu. Sumiiffinni amerlasuuni takutitsineq aamma akisuvoq, saqqummersitsigaangatta aningaasartuutit nammineq akilertarpagut, tassa angalaneq, akunnittarfiit aamma saqqummersitsivinnut aningaasartuutit akisuut.

Soqutiginninneq annertooq – kisianni aqqut takisooq

Tokyomi saqqummersitsineq Bibi Chemnitzimut kapitalimik nutaamik aallartitsivoq.

- Maani saqqummersitsineq misilerarparput, kisianni atisanik niuerniarneq ilungersornartuuvoq aamma ilungersorluni sivisuumik sulinermik pisariaqartitsivoq.

Atisanik ilusilersuisartoq maannamut isumalluarnissamut tunngavissaqartoq isumaqarpoq.

- Soqutiginnittoqarluarpoq. Japanimi Asiamilu allani pitsaasumik niuerluarsinnaanissarput upperaarput. Illoqarfimmiorpalaartumik asimi atugassatut atisaliarisartakkagut maani nuannerineqarluarput, tamannalu kalaaliunitsinnut aamma nunanit avannarlerneernitsinnut ataqatigiisitsilluarpoq. Aqqusinerni inunnik ulikkaartuni angalaaraangatta atisalioriaatsitsinnut tulluartunik kisissaanngitsunik takusarpugut.

- Kisianni maani niuerneq imaaliallaannaq aallartitassaanngilaq, angorusutarput anguniarutsigut maanga arlaleriarluta angalaqqaartariaqassaagut, ilungersorlutalu sulilluta pitsannguuteqarluta.

- Angerlarluta tamanna eqqarsaatigissavarput aamma pitsaanerpaamik qanoq iliorsinnaanerput eqqarsaatigissallugu.

- Isumassarsiorfinnik aamma isumassarsianik ulikkaarsimallu angerlaqqissaagut, attaveqarfigullu amerleriaqqissimassallutik.

Saqqummersitsinermut suut naatsorsuutigaagit?

- Ukiuni 13-ini suliaqarfimmi sulereerlunga naatsorsuutit qaffasippallaamik inissinnissaat mianersuunneqartariaqartoq nalunngilara, piffissamik atuiffiusarpoq aamma inuit takunneqqaarusuttarput – taamaattumik misileraanerit makku periarfissaqarneranik misileraaffittut atortarpagut. Pisianiarfinnut attaveqalernissarput naatsorsuutigaarput, tusagassiorfinnut allanullu, tamannalu iluatsilaalereerpoq, kisianni sumi saqqummersitsinerput aamma ikiortigisagut allanngortilaagassaasut isumaqarpunga. Kisianni nuannaarutigalugulu naammagisimaarparput, angalanitsinnilu tamanna siullertut pingaarnertullu anguniagaavoq.

Kisianni tassa Japanimi aallarniipput.

- Aap, angusat aalajangersimasut amerlanngitsut aamma pipput, kisianni taakku maanna inissivitsinnagit oqaluuserisinnaanngilakka.