Biskoppi: Juulli katersuuffiuvoq
December qaammataavoq palasinut ulapinnarnerpaaq. Ullorli aalajangersimasoq Paneeraq Siegstad Munkip pingaartilluinnarpaa - tassa decemberip 26-at. Allaaserisami paasisaqarfigineruguk, juullimullu suna kissaatigineraa atuarlugu.
Eqqaamaqqissaarpaa.
Ullaakkut sila taartoq qiianartorlu, seqineq nuinavianngitsoq, igalaanili ullorissat ikumasut qaammallu kisimik qaammaqqutaasut. Tassa Attumi Kangaatsiap nunaqarfiani, nunatta biskoppiata Paneeraq Siegstad Munkip peroriartorfigisaani juulli.
- Qaammaqqutinnguit Adventip nalaani ikitersut, ukiup taarnerpaaffiani neriunnermik kissalaarnermillu misigititsisarmata. Oqaluttuannguarlu pisoqalineq ajortoq Annaassisunnguup inunngornera tarnimut eqqissinartoq nuannaarnartorlu kingumut tusartaratsigu. Meeqqaniit utoqqarnut tamatta ataatsimoorfipput, biskop Paneeraq Siegstad Munk oqaluttuarpoq.
Taanna oqaluttuarpoq juullip ullui adventillu sapaatai ilagiinnut pingaaruteqarluinnartut.
Juulli ulapaarfiusarpoq
24. decemberimiit 26. decemberimut, aamma ukiutoqqami ukiortaamilu naalagiartitsinerit arlallit naammassineqartarput.
Biskoppi Paneeraq Siegstad Munkip juullip ullui palasinut ulapaarfiusartutut taavai. Juullip evangiliua ilagiinnut oqaassitigineqartarpoq, innuttaasunullu sammisassaqartitsinerit allat aamma piareersarneqartarlutik. Piareersaanerilli oktoberimili aallartereertartut, biskoppi oqaluttuarpoq.
Nunatta biskoppianut ulloq 26. december immikkuullarissuuvoq. Ullorlu taanna ilaquttani nerersuaaqatigisarpai.
- 26. december katinnikuugatta aatsaat allatulli nerersuartarpugut Juullip ulluata aappaani. Pingartitsinera qamani privatimik nipaattumik atortarpara, isummakkut Attumi meeraanera qanitittuartarpara, biskoppi oqaluttuarpoq.
Biskoppeqarfimmut ukioq pikkunartoq
Ukiup naajartulernerani ilagiinni pisimasut biskoppip eqqarsaatigai. Taassuma nassuerutigaa palaseqarfiit iluini suliassaqarluarsimasoq.
Palaseqarfimmi sulisut akornanni ingutsinerup unitsinninniarnissaa assorsuaq nukinnik atuisimasoq taassuma eqqaavaa.
- Palasimi suliffeqarnitsinni najukkami aqutsisutut inissisimalluni toqqissilluni sulippat, neriukkama suleqatigiinnut tamanut nuannersumik siaruarterisassasut.
Ukioq nutaami nalliuttorsiutissarpassuit
Biskoppeqarfiup ukiumi nutaami ilagiit biskoppeqartalernerannit ukiut 30-nngortorsiorlugu nalliuttorsiutigissavaat. Nunatsinni biskoppeqalernermit nalliuttorsiortoqarnissaanut atatillugu tussiutinik nutaanik suli saqqummernikuunngitsunik saqqummersitsinissaq sulissutigineqartoq, Paneeraq Siegstad Munk ilisimatitsivoq.
- Tamanna nalliusserusuppara nutaanik tussiutinik katersinerup aallartinneranik. Neriuppunga sinerissami tussiutinik nutaanik, tussiutit maanna naqitani ilaanngitsunik ilanngutassanik, minnerunngitsumillu tussiaqattaarutinik katersiviup aallartinnissaa suliniutigissavarput, oqarpoq.
Ilageeqarnerup eqqunneqarneranit 2023-mi ukiut 60-nngussapput aamma. Palaseqarfik biksoppeqarfillu tassunga atatillugu ilagiit sinniisaasa aaqqissuussaanerata pitsaanerulersinnissaanut eqqarsaatersuuteqarput.
- Taamaakkami ilagiit oqartussaaqataanerat sineriammi nappatigisatta annersarimmassuk, taakkunani atugassarititaasut tulliani 2025-mi qinerseqqinnissatsinnut aaqqereerusukkaluaqaakka. Taanna kingulleq juullimut Biskoppip kissaataatut taasinnaavarput, biskoppi Paneeraq Siegstad Munk oqarpoq ilagiillu juullisiorluarnissaanik kissaappai.