Cheeky Kalaallit Nunaannut asannilerpoq

Ammasoq. Inussiarnersoq nunamullu tunngasoq. Sacha Malinský, eqqumiitsuliortutut Cheekymik atilik, Inuk Hostelsimi naapikkakku taama malugaara. Sumiiffik, pinngortitamik avatangiisilik imaanut kusanarluinnartumik isikkivilik.

Cheeky eqqumiitsuliortuuvoq Christianiami aasaq manna Stjerneskibimi kusassaasoq. Eqqumiitsuliai aamma sinerissami sumiiffinni arlalinni takuneqarsinnaapput. Assersuutigalugu Tasiilami meeqqerivimmi qilalukkat qernertat “Piginnaanerarpuli”-mik allannertallit. Kommuneqarfik Sermersuumiittut suluit qalipaatigissut aamma Sisimiuni Nutaqqami qatanngutit pingasut Canadamut, Kalaallit Nunaannut Alaskamullu assersuutaasut.

Maannakkut ersinngitsumik innarluutillit pillugit suliniummik pingaarutilimmik suliaqarpoq, taannalu Nuummi kulturip illorsuani Katuami saqqummersinneqassaaq. Kingusinnerusukkut uterfigiumaarparput. Cheeky kinaanersoq paasisaqarfigeqqaalaariartigu.

Ukiut 39-t matuma siorna juulip 12-ianni 1985-imi inunngorpoq.

- Christianiami peroriartorpunga. Uagutsinnut meeqqanut tupinnartorujussuuvoq, pisartut amerlammata. Assersuutigalugu immaqa meeqqat ilaannaasa ullaakkut iterlutik siutituup naatsiivimmut isersimanera misiginikuuaat. Oqaluttualiatut misinnarpoq, inuppassuimmi assigiinngitsut qalipaatigissaartullu akornanniilluni, Cheeky oqarpoq.

Angajoqqaavi, Ulla Malinský aamma Lars El-Azem, inunngornissaa qaammatialuit sioqqullugu qimapput.

- Araberisut kinguliaquteqaraluarpunga, anaanama ataatamalu inuiaassussaat tamarmik allaneersuupput, oqarpoq.

Cheekyp aataava Tjekkiamiuuvoq. Oqarnera naapertorlugu aataava naqiterisuuvoq isumaqatissarsiorluni plakatiliortarnini pissutigalugu Tjekkiamiit qimaasimavoq, kommunistiniimmi malersorneqarami. Sivisuumik angalareerluni franskit sakkutuuinut ilannguppoq, tassanilu sorsuppoq. Tassani Cheekyp aanaanut esperantorisut, eqqumiitsuliortut oqaasii, allattarsimavoq. Ukiuni arfineq-marlunni allaqatigiittareerlutik Københavnimi naapipput katillutillu.

- Ataataga Christianiamut 1974-imi nuuppoq, Stjerneskibet-imilu najugaqaqqaarpoq. Taamaattumik taassuma pinnersarnissaa uannut isumaqarsimaqaaq. Angajoqqaanni siulliulluni Christianiamut nuuppoq, tassanilu naapipput, Cheeky oqaluttuarpoq.

Inunngortinnagu ataataa Christianshavnimut nuuppoq.

- Sanileriillutik najugaqatigiittuaannarsimapput, taamaattumik tamanna uagutsinnut meeqqanut oqitsuusimalluni, Cheeky, animinik peroriartoqateqartoq oqaluttuarpoq. 16-inik ukioqarluni ataataminit aqqalutaarpoq.

Kiffaanngissuseq Marvelilu

Cheekyp eqqumiitsulioriaasia, qarmamik titartaasarnermik hiphop-imillu sunnerneqarsimasumik, meeraaneraniit ineriartorpoq.

- Titartakkat nangeqattaartut nuannaraakka, peroriartorninnilu taakkuninnga atuartarlunga. Anaanaga taakkuninnga ulikkaarpoq, soorlu Marvelimit Robert Crumbimut franskillu titartakkanik nangeqattaartuliaat amerlasuut. Titartaariaatsinnut sunniuteqangaatsiarsimapput, oqaluttuarpoq.

Christianiami peroriartorneq kiffaanngissuseqarfiungaaraluartoq ataatsimoorfiungaaraluartoq aamma illuatungeqarpoq.

- Meeraalluta takusassarinngisatsinnik takusaqarpugut, kisianni asaneqarnitsinnut naleqqiullugu annikinnerupput. Uagutsinnut meeqqanut kiffaanngissuseqartorujussuuvoq. Christianiami biileqanngimmat sumi tamaani pinnguarsinnaavugut. Amerlanerit imminnut nalunngisariipput, taamaattumik tamarmik imminnut paaripput. Tamanna aamma maani Kalaallit Nunaanni misigisimalluarpara. Nakkutigineqartumik kiffaanngissuseqarujussuarneq, oqarpoq.

Cheeky Christianshavnimi atuarfiani atuarpoq. Atuarfik taamani ajorneruvoq majuartarfiilu aseqqukuullutik. Nuannaraali.

- Taamani eqqarsartaaseq allaavoq. Atuaqatigiit atasorujussuuvugut, meeqqallu atuarfianni atuarneq nuannareqaara, eqqaamasalersaarpoq.

Cheekyp atuarfimmi ilinniartitsisuata paasivaa pinngorartitsisinnaallunilu ineriartortitsisinnaasoq.

- Suliaqartilluta titartaarsuaarsinnaatitaavunga. Aamma ilaannikkut ajoritittarpunga atuarnerup nalaani titartaasarama. Matematikkimi ilinniartitsisora ajorisisoq quianartunngorlugu titartarnikuuara, illarpoq.

Cheeky pinngorartitsiuartarnikuuvoq, ilaatigut ilaquttaminit, anaanaminit ataataminillu eqqumiitsuliortuusumit, maligassaqarami.

Aniata meeraasoq Tinny Malinskéhop qarmami titartaasarnermik ilinniartippaa, aqqusinikkut biilertillutik qarmani titartakkanik misissuisarnissamik ilinniartippaa.

Titartaasarnermi saniatigut ikinngutinilu pinnguaqatigisarpai aneernerujussuusarlunilu.

- Asuleerujoortarpugut, sikkilerluta misigisassarsiorlutalu. Nuannarisorujussuuara. Aamma nalukkiartaqaanga, titartaalluni isiginnaartitsillungalu, Cheeky oqarpoq.

Qulinik ukioqarluni Kalaallit Nunaat pillugu siullerpaamik misigisaqarpoq. Arnaata ikinngutaa Kalaallit Nunaanneersumik tunissutissaqarluni tikippoq.

- Kalaallit Nunaannut attaveqarnera meeraaninniilli aallartippoq. Ilaqutariittut kalaallinik ikinnguteqarpugut, eqqaamavaralu anaanama ikinngutigilluagaa Kalaallit Nunaannit angerlarmat, nammineq pisaminik ukallinik nassartoq. Aamma kalaallit iverusiaannik nassarpoq. Suli ullumikkut pigaakka. Uannut pingaaruteqartorujussuupput, Cheeky oqaluttuarpoq.

Qarmami titartaasartut akornanniinneq

Meeqqat atuarfianni ukiumi atuarfiusumi kingullermi anaanani annaavaa, tamannalu pissutsinik tamanik allannguivoq, ingammik qanilluinnarsimammata.

- Ilaquttavut ikinngutivullu ataqatigiilluarmata anigalu ingerlalluarpugut. Misigisimasavut pissutigalugit suli nukittunerulerpugut. Anaanarput asannittupilussuuvoq nukissaqarluartupilussuullunilu. Tunniussaqarnikooqaaq, tunniussaalu ima annertutigipput aninnut uannullu suli sunniuteqarlutik. Tassuunakkut suli maaniippoq, Cheeky oqaluttuarpoq.

Meeqqat atuarfianni atuareerluni Christianshavnimi aamma ilinniarnertuunngorniarpoq.

- Oqartarnerattut Christianshavnermiutut ilisarnaateqarpunga, illarluni oqarpoq.

Ilinniarnertuunngorniarfik naammassisassaannartut isigaa. Anguniakkaminut, tassa pinngorartitsisutut anguniagaqarnerminut, sakkussaq. Taamaattumik soqutigisani sammisarpai: hiphop, ikinngutit qalipaanerlu.

2004-mi ilinniarnertuunngorpoq, Holbækimilu eqqumiitsuliornermik ilinniarfimmi kingornalu 2007-imi Københavnimi Teknisk Skolemi aallartinnginnermini assigiinngitsunik suliffeqarluni.

- Inuusuttunut pinngorartitsisartunut sorusunnerluni paasiniaanissamut periarfissatsialaavoq. Naqiterineq, qalipaaneq digitalimillu ilusilersuineq toqqarpakka, taanna oqarpoq.

Tamatuma nalaani Københavnimi qarmami titartaasartut hiphop-ertartullu akornanniippoq, tamannalu suli eqqumiitsuliorneranut sunniuteqangaarpoq.

- 90-ikkunni qarmami titartakkat soqutigivallaanngilakka. Christianshavnimi takusakka tassaapput heavy metal-iusorujussuit, soorlu Metallica aamma Pantera. Soorlu maani majuartarfeqarfinniittutulli nuannareqisattulli. Kisianni qarmami titartaanermik suliaqartut iserfigigakkit, qanoq assigiinngitsigisunik titartaariaaseqartoqarsinnaanera takuara, tiguarteqaangalu. Tamannalu attaveqarfigilluarpugut, Cheeky oqaluttuarpoq.

Tamatuma kingorna USA-mi, Asiami Europamilu qarmarsuarnik qalipaasimavoq festivalinilu assigiinngitsuni, soorlu Roskilde Festivalimi, Scandinavian Reggae Festivalimi nunanilu tamalaani qarmami titartaasartut festivaliani Meeting of Stylesimi qalipaasimalluni.

Saqqummersitsineq siulleq

2008-mi Københavnimi Det Kongelige Akademis Designskolemi ilinniartunngorpoq, tassanilu Danmarkimit Australiamut angalasarpoq, Swinburne University of Technologymi semesterini arlalinni paarlaasseqatigiilluni ilinniartuulluni.

- Taamani Melbournemi eqqumiitsuliornermik suliaqartorujussuanngorpunga. Qarmarsuani qarmanilu titartaanerit taamani Danmarkimut sanilliullugu eqqumiitsuliatut pingaartinneqarnerungaarput. 2012-imi Australiami siullerpaamik nammineq saqqummersitsigama takorluugaq piviusunngorpoq, oqaluttuarpoq. Australiap aamma Kalaallit Nunaannut aqqutissiuuppaa.

- Australiami universitetimi ilinniarama sapaatip-akunneri tallimat suliniummik suliaqarpugut. Amerikamiut naggueqatigiit oqaluttuatoqaat sammivakka. 2014-imi Københavnimi Designskolenimi soraarummeerlunga suliniuteqarninni atortussianik USA-mut nammineq katersuiartornissara pilersaarutaagaluarpoq, Cheeky oqaluttuarpoq. Allamilli pisoqarpoq.

- Isumaliulerpunga: Sooq Kalaallit Nunaanni taamaaliussanngilatit? Danmarkimi atuarfinni paasissutissanik pisariaqartitsisoqartillugu tamanna atuartitsissutitut atorneqarsinnaavoq, nassuiaavoq.

Taamaattumik USA-mukarnani januaarimi issittumi Kalaallit Nunaannut aallarpoq, Kangerlussuarmilu issittoq siumorlugu.

- Nuanneqaaq! Naapeqqaarnermi asannilerneq. Asanninnermik tunineqarpunga, tunniussivungalu. Nuummi blok 15-imi najugaqaqqaarpunga. Taava Ilulissiarlungalu Narsarsuarmukarpunga, oqaluttuarpoq.

Naggataarutaasumik suliaq allatut ingerlavoq.

- Atuakkatut saqqummerpoq oqaluttuatoqqanik meeqqanit oqaluttuarineqartunit imaqarluni. Meeqqat aamma atuakkami assiliartat qanoq isikkoqarnissaat ilusilersueqataaffigaat, taamaattumik uanga qitiusutut attaveqaatitut inissisimaneruvunga. Suut tamarmik pissusissamisut ingerlaannarput, uummatiga malittuaannaavillugu, taannalu Kalaallit Nunaannut ingerlatitsivoq, Cheeky oqaluttuarpoq. Kingusinnerusukkut 2014-imi Sisimiuni workshoppertitsisinnaanerluni aperineqarluni attaveqarfigineqarpoq.

- Tassungarnissaq takorluugaasimavoq. Inuusuttut nuannersut suleqatiginissaat. Workshoppertitsereerlunga nammineq aningaasaateqarfinnut qinnuteqartalerpunga ajunngitsuliornermullu tunngasunik aaqqissuussisarlunga. Taamaaliorlunga Sisimiuni workshoppertitsiuarpunga. 2018-ip tungaanut taamaaliorpunga, oqaluttuarpoq.

2019-imi nipilersortartoq Jonas Nilsson aappartaarigamiuk, Nuummi najugaqarluni eqqumiitsuliornermik workshoppertitsinermillu suliaqartalerpoq.

2020-mi Cheeky nammineq suliniuteqarnermigut eqqumiitsuliortut illoqarfimmeersut illoqarfiup illuisa qarmaani qalipaanermik ilinniartitsinermut aningaasanik tapiissutinik qinnuteqarmat, Nuuk qalipaatigissaarnerulerpoq.

Allaaserisap matuma allanneqarnerani Cheeky eqqumiitsulianik saqqummersitsinissamut piareersarpoq, saqqummersitsinerlu qaammatip tulliani septembarimi Katuami pissaaq.

- ADHD-mut tunngatillugu nuannersorpassuit sammissavakka. Tamanna amigaatigineqarmat, taama oqarpunga meeqqat inuusuttullu amerlasuut ADHD-qarmata, tamannalu maluginiarneqanngitsunik nuannersorpassuaqarmat. Tamanna eqqumiitsulianni takutinniarsaraara. Eqqumiitsuliamma kivitseqataanissaat uannut pingaaruteqarpoq, oqaluttuarpoq.