Daniel Biancop kakkannerpaani unammeqataassaaq
Arfininngorpat 17-inik ukiulik Nuummeersoq Daniel Bianco "Danmarks bedste sologuitarist"-imi unammeqataassaaq.
– Ataqqinaataasorujussuuvoq guitarimik takutitsinersuarmi peqataanissaq, Daniel Bianco Danmarkimit telefonikkut oqarpoq. Taanna unamminissamut "Copenhagen Guitar Battle"-mut piareersimavoq, tassani kisimiilluni guitarertartoq kakkannerpaaq toqqarneqassalluni.
Danielip, Århus Katedralskolemi 1.g-mi atuartup, qaammatit marluk matuma siornatigut videomik immiussani unammisitsisunut nassiuppaa, guitarertartullu allat 35-it aamma taamaasiorsimapput.
– Videomik immiussara nuannariinnarlugu nassiuppara unamminivissamullu toqqarneqarnissara naatsorsuutigisimanngivikkaluarlugu. Taava nalunaarfigineqarpunga peqataassasunga, Daniel nuannaarluni oqaluttuarpoq.
– Unammineq imatut ingerlanneqassaaq scenemi guitarerluta immitsinnut unammissalluta, unamminertulli allatulli kvartfinaleqarlunilu semifinaleqassaaq naggataatigullu finalertoqassalluni, tamassumali angunissaa ilimaginngilara, Daniel oqarpoq.
Taanna unammisuni nukarlersaassaaq, nukarlerpaap tullia 23-inik ukioqarluni. Qanittumiikkuit Daniel Biancolu illersorusukkukku arfininngorpat Amager Bio-mukassaatit, iserneq 175 koruuneqarpoq.
Daniel Biancop videoliaa takuuk uani.