Danmarks-ekspeditioni pillugu immikkut saqqummersitsineq
Nordatlantens Brygge Københavnimiittoq Danmarks-ekspeditionip ukiunik 100-unngortorsiornerata naggataaneqarneranut atatillugu immikkut ittumik saqqummersitsissaaq.
Ilisimasassarsiornermi ukiunik marlunnik sivisussuseqarsimasumi Kalaallit Nunaata kangiata avannaata ilisimatuussutsikkut misissuiffigineqarnissaa salliutinneqarsimavoq.
Ilisimasassarsiortuni peqataasut 28-it 1906-imi aasap naajartornerani umiarsuarmut ilisimasassarsiortartumut Danmarkimut ilaallutik allorniusanut ilisimaneqanngitsunut aallarput. Siunniussaavoq Kalaallit Nunaata kangiata Avannaa, taamanikkut suli ilisimaneqanngitsoq. Anguniagaasimavoq allorniusat avannamukaartut 77-ianniit 82-iata missaannut nunap assiliorneqarnissaat, aammalu nunap tamatuma naasoqassusia, uumasoqassusia, nunataata ilusaa silap qanoq issusia allallu pillugit paasissutissanik katersinissaq.
Ilisimasassarsiortut anguniagassatut siunniussat anguaat, taamalu ilisimatuussutsikkut imatut iluatsilluarluni, kisianni inuit pingasut inuunertik akigaat.
Suliniuteqaqqaartoq ilisimasassarsiornermilu pisortaasoq Ludvig Mylius-Erichsen, kalaaleq piniartoq Jørgen Brønlund aamma nunap assilialiortartoq Niels Peter Høegh-Hagen umiarsuarminnut uterniartillutik ajunaarput, nunap avannarpasinnerpaartaata Peary Landip nunataanik assiliornertik iluatsilluartumik ingerlatsereerlugu. Toqunerannut atatillugu pisimasut suli ilaannakusumik ilisimaneqarput, naak uterluni angalaneq inuunermik naleqartoqpillugu paasiniaallutik ilisimasassarsiornerit arlallit kingornatigut ingerlanneqartarsimagaluartut.
Saqqummersitsinermi taamanikkut peqataasimasut ulluinnarni atugarisimasaannik paasissutissiivoq, aammalu angalanermi suliassarpassuit unamminartorpassuillu takuniaasunut ilisaritinneqarlutik - soorlu piniarneq, eqqakkanik ajornartorsiutit, peqqumaatissat, qimussimik angalanerit kiisalu ilisimatuussutsikkut paasiniagassanik katersat.
Danmarks-ekspeditioni qallunaat avannaarsuarni ilisimatuussutsikkut ilisimasassarsiortarnerisa suli annerpaartaraat.
Saqqummersitsineq Arktisk Insititut suleqatigalugu aaqqissuunneqarpoq ukunanngalu suliarineqarluni: Odder Museum, Ringkøbing-Skjern Museum aamma Gilleleje Museum, Arktisk Institut, Nunatta Katersugaasivia aamma Kaptajn Alf Trolles Legat.