Danskit atornerluisoq pillugu filmiliaat Europami filmfestivalimut innersuunneqartoq
Europami San Sebastián Film Festivalimi danskit filmiliaat ”Kalak” Isabella Eklöfimit suliarineqartoq pingaarnertut innersuunneqartunut ilaavoq.
Danskit filmiliaat ”Kalak” Isabella Eklöfimit suliarineqartoq San Sebastián Film Festivalimi unamminermi pingaarnermi siullermeerluni takutinneqassaaq.
Det Danske Filminstitut taama allappoq.
”Kalak”-mi isiginnaartut Janip Kalaallit Nunaanni inuuneranik takutitsiffigineqarput, tassani ilaquttani najugaqatigai. Inersimasutut najukkami ataatsimooqatigiinnermut ilanngunnissani neriuutigaa. Tassa taakku ”kalammik” taaneqartarput.
Jan inuusuttuunermini atoqatigiinnermik aamma nakorsaatinik atornerluisuunermi kingorna imminut peroriartornerminiillu qimarratiginnippoq. Taakku peroriartorneranit aallaaveqarput, tassani angumminit atornerlugaasimavoq, allaaserisami taama allaqqasoqarpoq.
- Oqaluttuaq Kim Leinep inuuneranik tunngaveqarluni inuttut oqaluttuaavoq, taassumalu filminngortinnissaanut akuerineqarnera tulluusimaarutigeqaara, Det Danske Filminstitut naapertorlugu Isabella Eklöf oqarpoq.
- Filmimi danskit kalaallillu kulturiat unnersiutigisinnaasimavarput, filmiliarlu tulluusimaarutigeqaara, nunarsuarmilu takutinneqarnissaanut qilanaarpunga.
Isabella Eklöf 2018-imi siullermik filmiliaminik "Holiday" saqqummersitsivoq, taanna Sundancemi takuteqqaarneqarpoq. Filmi Bodilip nersornaasiuttagaannik sisamanik nersornaaserneqarpoq, ilaatigut danskit filmiliaanni pitsaanerpaattut aamma arnani pingaarnertut inuttaatitaq nersornaaserneqarluni.
Filmimi inuttaasut ilagaat Emil Johnsen, Asta August, Berda Larsen aamma Connie Kristoffersen.
Filmfestival San Sebastián 22.-30. septembarimi pissaaq, tassanilu aamma Nikolaj Arcelip filmiliaa ”Bastarden” Perlakimut ilaalluni takutinneqassaaq.
"Kalak" Danmarkimi biografini 7. marts 2024-mi takuteqqaarneqassaaq.