Dronningip pinnersaatai nunatsinneersut saqqummersinneqartut
Dronning Margrethep pinnersaata nunatsinneersut Amalienborgip katersugaasiviani saqqummersinneqarput. Dronningip ukiuni 50-ini dronngingiusimanera nalliussillugu saqqummersitsisoqarpoq, dronningillu pinnersaatini Kalaallit Nunaanneersut ukiut ingerlaneranni pissarsiarisarsimasani immikkut nuannarilluinnartuuai.
Broche tugtupit-imit sanaaq, ujameq aarrup tuugaavanik sanaaq Naasut-diadem-ilu kuultimik nunatsinneersumik sanaaq saqqummersitsinermi taaguuserneqarsimasumi ’Dronningip pinnersaataasivia – ukiuni 50-ini dronningiusimanerup pinnersaatitigut oqaluttuassartaa’ (’En dronnings smykkeskrin – 50 år på tronen fortalt i smykker’) saqqummersitsinermi maannakkorpiaq takuniarneqarsinnaapput.
Dronning Margrethep ukiuni 50-ini dronningiusimanermi nalliuttorsiutigineqarneranut atatillugu Amalienborgip katersugaasiviani saqqummersitsineq januaarip 21-ani ammarpaa, Kongernes Samling-imit ilisimatitsissutigineqarpoq.
Naasut-diadem immikkuullarissuusoq dronningip arlaleriarluni atortarsimavaa, diademi dronningip dronningiunermini 2012-imi ukiuni 40-nngortorsiorneranut atatillugu tunissutaavoq. Diademi saqqummersitsinermi alutornarnerpaatut inissinneqarsimavoq.
- Diademi kuultiusoq iverutitaqartoq kuultinik saffiortartumit Nicolai Appelimit sananeqarsimasoq kuultiviuvoq nunatsinneersoq 110-nik silisanik diamantitaqarpoq. Diademi naasut Kalaallit Nunaanneersut 17-it malillugit ilusilersugaavoq, Kongernes Samlingimit tusagassiorfinnut nalunaaruteqarnermi oqaluttuarineqarpoq.
Broche Tugtupit-imit sanaaq Dronning Ingridip Dronning Margrethemut kingornutsissimagaa
Naasut-diadem-ip saniatigut Dronning Ingridip brochea tugtupit-imit sanaaq aamma takuneqarsinnaavoq. Dronning Margrethep broche nuannarisupilussuunerarpaa, dronningip anaanaminit kingornussimagamiuk, dronningi oqaluttuarpoq:
- Broche kuultimik qaamasumik sanaajusoq ujarattaqarpoq aappaluttunik qaamasunik qalipaatilinnik. Tugtupit Kalaallit Nunaanni ujaraavoq ajoraluartumik Kalallit Nunaannit takussaajunnaalersoq. Taanna anaanannit kingornussimavara, qatanngutinnit uangalu peqatinnit anaanama 60-iliinermini tunissutisiarisimasaa.
- Broche aputittut qaamasutut isikkoqarpoq, tugtupit-illu ataasiakkaat kipparissuusut aappaluttumik qaamasumik qalipaatillit kusagisupilussuuakka, Dronningi atuakkami, saqqummersitsinermut atatillugu Kongernes Samlingip Politiken Forlagillu suleqatigiillutik saqqummersissimasaanni oqaluttuarpoq.
Saqqummersitsinermi aamma iverutit kuultiusut diamantitallit aamma tugtupit, iverutit Kalaallit Nunaanneersunik kuultitallit aamma Namminersornerullutik Oqartussat nersornaasiussaat kuultiusoq takuneqarsinnaapput.