Ellen K.
Frederiksen Qassiarsummi ukiut 40-t sinnerlugit ilinniartitsisuullunilu
savaatilimmut nuliaavoq. Taanna oktobarimi soraarninngussaaq,
taamanikkussamullu piffissani qanoq atortassanerlugu eqqarsaatigilereerpaa.
Ellen K.
Frederiksen Qassiarsummi ukiut 40-t sinnerlugit ilinniartitsisuullunilu
savaatilimmut nuliaavoq. Taanna oktobarimi soraarninngussaaq,
taamanikkussamullu piffissani qanoq atortassanerlugu eqqarsaatigilereerpaa.
- Soraarninngoreernermi
sulerisarnissaq soorunami eqqarsaatigineqartarpoq, uangalu
nuannarilluinnakkannik suliaqarnissara pingaartippara, Ellen K. Frederiksen
oqarpoq.
Ellen K.
Frederiksenillu aliikkutaralugu sammisartakkani toqqarpaa: tassa nuersaaneq meqqulualinnillu manngertuliorneq, Qassiarsummilu
nunaamminni meqqunik qiviunillu suliaqartarfimmik nutaamik oktobarimi
ammaassaaq. Taamaattumik meqqunik suliaqarluni aasaq 2025-mit
pikkorissartoqarsinnaalissaaq. Tamanna Lindblad Artisan Vendor Fundimeersunik
suleqateqarnikkut piviusunngortinneqassaaq, taakkulu Ellen K. Frederiksenip atortussai
tunniukkiartorlugit umiarsuarmut ilisimatusaammut ilaallutik Qassiarsummut
sapaatip-akunnerata siuliani tikipput.
- Atortunik
tulluartunik amigaateqarneq pissutigalugu Kujataani meqqunik nioqqutissiorneq
unittooqqasoq paasivarput. Taassumalu saniatigut aamma meqqut 23.000 tonsit
Kalaallit Nunaanni ukiut tamaasa ikuallanneqartartut paasivarput. Taava qanoq
iliorutta nioqqutissiornerup aallarteqqissinnaanera Ellenimut apeqqutigaarput,
Alexandra Daleq-Clark, Lindblad Expeditionsimi piujuartitsineq aallaavigalugu
sulinermi aqutsisoq Qassiarsummi sapaatip-akunnerata uuma siuliani
tikeraarnermi oqarpoq.
Taanna
aningaasaateqarfik Issittumi aatsaat suliniuteqarpoq.
Unnuisarfik
siuarsarniaraa
Ellen K.
Frederiksen ilinniartitsisuunermi savaatilimmullu nuliaanermi saniatigut
Illunnguujuk unnuisarfiutigaa, taanna unnuisarfik Qassiarsummi
savaateqarfitoqqamiippoq. Tikeraat takornariallu unnuisarfimmiittussat Ellen K.
Frederiksenip suli sullittassavai, unnuisarfimmiittulli aamma nuersaanermut
tunngasunik sammisaqalersinnaanissaat aamma nutaatut pilersaarutigaa.
Taamaattumik taassuma sulinngiffeqarluni angalanerit nuersaanermik
aallutaqarfiutigisinnaasut pilersaarusiorlugit Sverigemi
angalatitseqatigiiffimmik oqaloqateqarpoq.
- Unnuisarfiuteqarnera
ingerlatiinnassavara, maannalu meqqut nuersaanerlu aallunnerulissagakkit
takornariat nuersaanermik soqutigisallit Kujataanilu savaateqarfinni
misigaqarusuttut soqutiginnilersikkusuppakka, Ellen K. Frederiksen oqarpoq
nangillunilu:
- Umiarsuit
arlallit nuersaanermik soqutigisalinnik ilaasoqartarput, taakkulu
sulinngiffeqarlutik unnuisarfimmiikkusuttut arlallit oqaloqatigaakka. Tamanna
siunissami ineriartortikkusuppara, taanna oqarpoq.
Meqqut
pingaaruteqartut
Qassiarsuk
ukiunik 100-nngortorsioqqammerpoq, tassa tunngaviliisut vikingillu kingorna
nunatsinni savaatillit siulliit Ortooraq aamma Tiipaaraq Frederiksen
nuannalluni persuarsiutigineqarmata.
- Ukiut
100-t kingulliit qiviarutsigit maanimiut tulluusimaarutissaqaqaat.
Savaateqarnermik ineriartortitsiinnarnerup saniatigut kinaassutimik
ataatsimoornermillu pilersitsivoq. Kulturitsinnut ilaalerpoq, kinguaariinnullu
tulliuttunut ingerlateqqikkusupparput. Taamaattumik pisimasut tulluusimaarluta
eqqaallugit siunissaq neriulluarfigaarput, Ellen K. Frederiksen oqarpoq.
Meqqullu
Kujataani atorluarneqannginnerat taassuma ugguaraa.
- Meqqut
savaateqarfimmi inuuniarnermi oqaluttuarisaanermut pingaarutilerujussuupput.
Taamaattumik meeqqunik ullumi ikuallaaginnartarnerput ajuusaarnarpoq. Tamanna
pinngitsoortinniarlugu piujuartitsinissarlu eqqarsaatigalugu
atorluaanerunissamut iliuuseqaqataarusuppunga, taanna oqarpoq.
Arlallit
suleqatigiittut
Ellen K.
Frederiksen Kujataani meqqunik suliaqartartut allat peqatigalugit qissinermik
ikaartitserinermillu pikkorissaanissamik pilersaaruteqarpoq. Kujataani meqqunik
nioqqutissiornissamik isumassarsiaq Lindblad Expeditionsimeersut Ellen K.
Frederiksenikkunnut siorna kaffisoriarneranni pinngorpoq.
- Pikkorissaanissamik
suliaqarnissaq pillugu arnat arlallit nunatsinniittut oqaloqatigereerpakka.
Ikaartiterillammaap annoraaminernillu eqqumiitsuliortup Magga Karlsenip
atortunik siunnersorpaatigut, qanorlu pitsaanerpaamik
ataqatigiisitsilluarnerpaanissarput anguniarlugu qissisartut arlallit
oqaloqatigivakka, Ellen K. Frederiksen oqarpoq.
Nunatsinni
assassorluni sulianik tulluusimaaruteqarnissaq aamma piujuartitsineq
eqqarsaatigalugu ataatsimoorluni siuarsaanissaq kiisalu meqqut atorlugit
nutaanik pilersitsinissaq siunertanut ilaasut, atuarfimmi ilinniartitsisutut
soraarninngulersup oqaluttuaraa.
- Ukiorsuaq
isseqisoq anigorniarlugu meqqut atorlugit tujuulussualiortarnerput
oqorsaasiortarnerpullu kinaassutsitsinnut ilaavoq.
- Kinaassutsitta
meqqunillu atuinitta siuarsaqqinnissaanut maanna periarfissaqalerpugut.
Atortunik peqalernerput maanimiut aamma iluaqutigissavaat. Taamaalilluta qanga
periuserineqarsimasoq maani atuleqqissavarput, aammali maanga tikeraartitsinnut
kulturitsinnik paasisaqarusuttunut iluaqutaassaaq, Ellen K. Frederiksen
oqarpoq.
