Akuersaarneqarpasippoq:
- Siunnersuut soqutiginarpoq, misissorteqqaarusulluguli,” IA-p kultureqarnermut oqaaseqartartua Nivi Heilmann Efraimsen Inatsisartut Kultureqarnermut Ataatsimiititaliaanni aamma siulittaasuusoq oqarpoq.
Akuersaarneqarpasippoq:
- Siunnersuut soqutiginarpoq, misissorteqqaarusulluguli,” IA-p kultureqarnermut oqaaseqartartua Nivi Heilmann Efraimsen Inatsisartut Kultureqarnermut Ataatsimiititaliaanni aamma siulittaasuusoq oqarpoq.
Nivi AG-mi sapaatit akunnerata siuliani saqqummersumi allaatigisamut ”Eqqumiitsuliortutsialappassuaqarpoq”-mik qulequtalimmut tunngatillugu taama oqarpoq.
Nivi Christensenip Nuummi Eqqumiitsulianik Saqqummersitsivimmeersup nunatsinni pisiortornermut eqqumiitsulianik pisiortornermut ataatsimiititaliaqalernissamik siunnersuuteqarnera allaatigisami tassani sammineqarpoq. Taassuma saamit nunaat, tassa saamit eqqumiitsuliaannik eqqumiitsuliortuinillu tapersersuisussamik siuarsaasussamillu eqqumiitsuliaanik pisiortornermut ataatsimiititaliaqartuusut taama siunnersuuteqarnerminut isumassarsivigisimavai (paasissutissat takukkit).
Saamit eqqumiitsulianik pisiortornermut ataatsimiititaliaat (SIK)
Siunertaa:
Ataatsimiititaliap saamit eqqumiituliaannik siuarsaanissaq, uupernarsaanissaq toqqortaateqarnissarlu anguniarlugit taakkua eqqumiitsuliaannik pisiortornissaq pingaarnertut suliassaraa. Katersai katersuuffinni tamanit takusarneqariaannanngorlugit tamanut ammasumik katersuuffiusartuni saqqummersinneqakkajupput.
Tunuliaqutaa:
Ataatsimiititaliaq saamit eqqumiitsuliortuisa tapersersorneqarnissaat, taakkualu suliaat inuiaat allat eqqumiitsuliaattulli nersorneqarnissaat toqqortaatigineqarnissaallu qulakkeerumallugit pilersinneqarpoq. Eqqumiitsuliortut namminneq aalajangiisinnaatitaanerannik kulturiminnullu attuumassutilinnik takutitsinissaannik siuarsaanermik kulturimut politikkikkut suliaqarfiuvoq.
Suleriusia:
Ataatsimiititaliami ilaasortat saamit eqqumiitsuliaannik kulturiannillu immikkut ilisimasaliupput. Taakkua siunnersuutit, saqqummersitsinerit eqqumiitsuliortullu attavigisatik aallaavigalugit pisiortortarput. Saamit nunaasa inatsisartuiniunerusoq pisortaniilluunniiunerusoq aningaasalersorneqartarpoq.
Ilaasortat:
Ataatsimiititaliami ilaasortat assigiinngitsutigut immikkut ilisimasaliupput, taakkualu assigiinngitsunik piginnaasaqarnerat isiginnittaaseqarnerallu aallaavigalugit eqqumiitsulianik toqqaasartussatut saamit eqqumiitsuliortuisa kattuffiannit, tassa Samisk Kunsterforbundimit toqqarneqarsimasuusarput.
Najoqqutaq: samidaiddar.no
Eqqumiitsulianik pisiortornermut ataatsimiititaliaq soorlu kalaallit eqqumiitsuliaasa oqaluttuarisaanitsinnut kulturitsinnullu pingaarutillit nunatsinniiginnarnissaannik qulakkeerisooqataasinnaavoq. Nivi Heilmann Efraimsen uterfigeqqeriartigu:
- Siunnersuutit kulturikkut kingornussatta nunatsinniiginnarnissaannut tunngassutillit tamaasa IA-mit tunngaviatigut akuersaartarpagut. Siunnersuummilli akuersitigata itigartitsissuteqartitsigataluunniit paasissutissanik amerlanerusunik pissarseqqaartariaqarpugut, Nivi Heilmann Efraimsen oqarpoq nangillunilu:
- Saamit eqqumiitsulianik pisiortornermut ataatsimiititaliaqarnermi sunik misilittagaqarnersut paaserusunnarpoq - ataatsimiititaliamillu taamaattumik pilersitsinissamut siunniussimasatik aamma naammassisimaneraat. Tamatuma saniatigut nunani allani nunatsinnut assingusuni – assersuutigalugu Savalimmiuni - qanoq periuseqartarnersut aamma paaserusunnarpoq (paasissutissat takukkit).”
Siunnersuut Inatsisartut Kultureqarnermut Ataatsimiititaliaannut saqqummiukkumaarini, IA-p kultureqarnermut oqaaseqartartuata ilisimatitsissutigaa. Parteeqatimili siunnersuummut isummersuutaat siunnersuullu missorluaqqaartinnagu oqaluusilluaqqaartinnagulu saqqummiunnianngikkini aamma erseqqissaatigaa.
Kikkut kalaaliuppat?
Illuatungiliuttut partiiat Naleraq kikkut kalaaliunersut suli nassuiarneqarnikuunngimmat siunnersuummut tapersiinissaminut tunuarsimaarnerarpoq.
- Kalaallit eqqumiitsuliaannik oqaluttuarisaanitsinnut pingaarutilinnik pisiortornermut ataatsimiititaqalissappat, taava kikkut kalaaliunersut nassuiarneqaqqaartariaqarpoq. Sulilu taamaaliortoqanngilaq,” Naleqqap kultureqarnermut oqaaseqartartua Inatsisartut Kultureqarnermut Ataatsimiititaliaanni siulittaasumut aamma tullersortaasoq Qupanuk Olsen oqarpoq.
Imalu nangippoq:
- Nunatsinni nunap inoqqaavini suli inuusut toqoreernikullu eqqumiitsuliaat Naleqqamit tapersersorpavut. Kalaallit Nunaannili nunap inoqqaavi kikkuuppat? Inatsisitigut illersorneqarsinnaajumalluta tamatuma nassuiarneqarnissaa pingaartuuvoq.
Kalaallit eqqumiitsuliaannik pisiortornermut ataatsimiititaliaqalernissaq Naleqqap tunngaviatigut akerlerinngikkaa, kikkulli kalaaliunersut tassa nassuiarneqaqqaartariaqartoq, Qupanuk Olsenip oqaatigaa.
Kalaallit eqqumiitsuliaannik pisiortornermut ataatsimiititaliaqalernissamik siunnersuut qanoq isumaqarfigineraa, ilinniartitaanermut, kultureqarnermut, timersornermut ilageeqarnermullu naalakkersuisoq Nivi Olsen aperaarput. Allaatigisalli massuma saqqummiutinnginnerani uterfiginngilaatigut.
Savalimmiuni eqqumiitsulianik pisiortorneq
Listasavn Føroya Savalimmiuni eqqumiitsulianik katersugaasiviullunilu pisiortortarpoq. Pisiortortuutissaminik aningaasaateqarfiunerusunit aningaasalersorneqartarpoq. Katersugaasivik imminut pigisuuvoq pisortaniit aningaasaliiffigineqartartoq.
Savalimmiuni pisortat eqqumiitsulianik pisiortornermut ataatsimiititaliaqanngilat.
Føroya Banki (BankNordikiusimasoq) savalimmiormiut eqqumiitsuliaannik 600-nit ikinnerunngitsunik katillugit 5 millionit koruunit sinnerlugit nalilinnik Tórshavnimi saqqummersitsivittaaminut arlaannaannulluunniit attuumassuteqanngitsuusumut imminullu pigisuusumut, tassa BankNordik-samlingimut 2017-imi tunissuteqarpoq.
Najoqqutaq: Færøernes Kulturministerium
