Eqqumiitsuliaq kalaalerpaluttortalik dronningimut tunniunneqartoq
Eqqumiitsuliaq “Imaq, Havið, Havet” eqqumiitsuliortup Jessie Kleemannip Kalaallit Nunaanneersup suliarinneqataaffigisaa, sisamanngormat Dronning Margrethemut tunniunneqarpoq.
Jessie Kleemann (talerpiup tullia) eqqumiitsulioqataavoq, eqqumiitsuliarlu sisamanngormat atoqqaarfissiorneqarluni Dronning Margrethemut tunniunneqarpoq.
Emil Nicolai Helms/Ritzau Scanpix
Sisamanngormat Københavnimi Nordatlantens Bryggemi nalliuttorsiornermut tunissut dronning Margrethemut tunniunneqarpoq.
Tunissut eqqumiitsuliaavoq eqqumiitsuliortunit Hansina Iversenimit Savalimmiuneersumit, Jessie Kleemannimit Kalaallit Nunaannit aamma Gudrun Haslemit Danmarkimit suliarineqartoq.
Dronningip ukiuni 50-ini naalakkersuineranut atatillugu Danmarkimi naalakkersuisunit Folketingimillu tunissutigineqarpoq.
Eqqumiitsuliaq tassaavoq Nordatlantens Bryggep talittarfiata aqqusernganik pinnersakkamik qalligaq.
Eqqumiitsuliortutut ilisimaneqarluartup kalaallip Jessie Kleemannip eqqumiitsuliami aalisakkat pingasut, soorlu „saarullissuit imarpitsinni tamani ingerlaartutut, mannillu marmorimik Kalaallit Nunaanneersumik qaqortumik sanaaq", suliarisimagai, Nordatlantens Brygge ilisimatitsivoq.
- Hansina Iversenip suliamini ullorissat 18-it assigiinngitsunik qalipaatillit Savalimmiunilu basaltimik sanaat eqqumiitsuliarai. Ullorissat tamarmik Savalimmiuni qeqertanut 18-inut tikkuussipput.
- Gudrun Haslep immami inneruularujussuit siaruarterpai, soorluttaaq nunani taakkunani pingasuni inneruulat siaruaqqasut, atoqqaarfissiorneqarneranut atatillugu Nordatlantens Brygge allappoq.