Eqqumiitsuliortup SPS-imi ilinniartut ataatsimuulersinniarlugit sammisaqartikkai
Akvarel atorlugu qalipaanikkut, perorsaasunngorniarfimmi ilinniartut ataatsimoornerulernissamik misiliitinneqarput.
Tarnikkut peqqissuuneq ataatsimoorlunilu pilersitsisinnaaneq sammisarineqarput, eqqumiitsuliortoq nunat tamalaani ilisimaneqarluartoq, Jeppe Hein, perorsaasunngorniartut tikeraarmagit. Taanna Ilulissani, Nuummi Maniitsumilu ilinniartut septemberimi sammisaqartissavai.
- Suliniut Pilersitseqatigiinnikkut ataatsimoorneq innuttaasut, matuma ataani ilinniartut,
paaqqinnittarfinnit inuusuttut eqqugaaratarsinnaanerusut aamma Kalaallit Nunaanni
atuarfeqarfimmit inuusuttut akornanni ataqatigiinnermi nukimmik pilersitsiniarluni
ineriartortinneqarpoq, ilinniarfik tusagassiorfinnut nalunaaruteqarluni allappoq.
Ilulissat Nuullu sapaatit akunnerni siullerni marlunni tikeraarneqareersimapput, Maniitsorlu Jeppe Heinimit sapaatip akunnerata tulliani tikeraarneqarnissaminut tullinnguuppoq.
Qanoq misigineq pillugu workshop
Jeppe Hein ilinniartitsisoralugu ilinniartut anernitik kiisalu isummatik qalipaatinik akvarelinik qalipassavaat. Kingorna ilinniartut nammiinneerlutik illoqarfinni taakkunani pingasuni paaqqinnnittarfinni toqqarneqartuni workshoppinik ingerlatsissapput. Illoqarfinni tamani ilinniarfimmi malunnartitsinissamut innuttaasut qaaqquneqarput.
Pilersitseqatigiinnikkut ataatsimoorneq piviusunngortinneqarpoq A.P. Møller Fondenip aamma Augustinus Fondenip tukkusuumik tapiissuteqarnerisigut.