erinarsoqatigiit Aavaat cd-mik saqqummersitseqqilerput
Kalaallit erinarsoqatigiit nuannarineqarnerpaat ilaat ukiumi nutaami pissanganartunik misigisaqartussaapput.
Erinarsoqatigiit Aavaat cd-liamik sisamassaata saqqummersinnissaat piareersaleruttorpaat, kisianni erinarsoqatigiit cd saqqummersussaq erinnanik sorlernik imaqarniarnersoq oqaatigerusunngikkallarpaat.
– Kisianni paasisakka naapertorlugit erinarsoriaatsit taamak ittut kalaallinit erinarsoqatigiinnit saqqummersinneqanngisaanarsimapput, Carsten Siegstad, erinarsoqatigiit Aavaat Københavnimi Kalaallit Illuutaanni arfininngornermi februarip aappaani nalingissaasumik ataatsimeersuarnerani siulittaasutut qinigaaqqittoq oqarpoq.
Erinarsoqatigiit københavnimi angerlasimaffeqartut siornaqtigut cd-nik pingasunik saqqummersitsereerput, saqqummersitaallu kingulleq "Qaammarpoq Nuna" 2005-imeersoq 3.000-it sinnerlugit tunineqarsimavoq.
Erinarsoqatigiit Aavaat DR-ip Kalaallit Nunaannut juullimi pilluaqqussutaani pisortatigoortumillu assigiinngitsuni aaqqissuussisarnerni peqataasarnermikkut ilisimaneqaleriartuinnarput. Taamalu erinarsoqatigiit Danmarkimi malugineqarneruleriartornertik misigisinnaavaat.
– "Qaammarpoq Nuna" Danmarkimi assut perusunneqarsimavoq, Carsten Siegsted oqarpoq.
Cd-p upernaap ingerlanerani immiunneqarnissaa pilersaarutaavoq.
Erinarsoqatigiit maanna 31-inik ilaasortaqarput, 1996-imilu aallartinnermiilli aatsaat taamak amerlatigaat.
Carsten Siegstad sisamassaa siulittaasutut ingerlalerpoq.
Poul Ringsted aningaaserisutut qinigaaqqippoq, ukiut qulingiluassaa ingerlatiinnarlugu. Najârak Nogal siulittaasup tulliatut qinerneqarpoq, Frederik Lynge allatsitut kiisalu Pavia Høegh siulersuisuni ilaasortatut.