Ernumanarpoq

- Ernumanartorujussuuvoq. 

Unnuakkut sinnattorisarpara – initoqaaq. Bitha Metelmann, præsident Trumpip Kalaallit Nunaannik tiguaaniarluni – “arlaatigut” iluatsinniarlugu – oqalunnera pillugu oqarpoq.

Bitha Metelmann Lollandimi Falsterimilu kalaallit peqatigiiffianni Aqissimi aningaaserisuullunilu erinarsoqatigiinnut Aqisseq Triomut ilaavoq. Erinarsoqatigisartagai marluk tassaapput siulittaasoq Benedikte Sivertsen erinarsoqatigiinnili taalliortuullunilu erinniortoq Bolethe Leonhardt.

Peqatigiiffiup Inuit-ip sapaatip-akunnerata siuliani unammisitsinerani taakku pingasuullutik ajugaapput. Erinarsuut Bolethe Leonhardtimit taalliarineqartoq Qaa, tamavitta Ataatsitut ajugaassutigaat.

Erinarsuutit killormut isumalik

Erinarsuut naliliisartut nuannarilluarpaat – aamma tusarnaartut. Amerikamiut pigissaartumik inuunerannik takorluugaq (the american dream) killormut saallugu kalaallinut tunngasunngorlugu taalliarisimavaa: Taamaasilluta tamatta Floridamukarluta seqinnisaariartorsinnaanngorlutalu kiassioriarsinnaanngorpugut, koorbumillu uitaarluta, Benedikte erinarsortoq Bitha nuannaajallalluni nillerpoq, Bolethelu mianersoqqusilluni tikini isaallugu kalaallit ataatsimooqqullugit kajumissaarpai.

Erinarsuut tusarnaartunik eqquivoq. Kalaallinut Danmarkimi najugalinnut, kalaallit nunatsinniittut assigalugit, pissutsit pillugit ernumasut qanoq misiginerannik oqaasinnguivoq.

- Pissutsit ilungersunarmata quiasaarutigisariaqarpagut, Bolethe Leonhardt, unnuup ataatsip ingerlanerani erinarsuummik sanasoq, oqarpoq.

- Takkutiinnarpoq - taamaammat allallunga aallartiinnarpunga. Kingorna erinniorniarsaraarput erinarsorlugulu misilittarlugu. Qanoq sananeqassanersoq ingerlaannaq isumaqatigiissutigaarput. Taamaattumik Tusa-mi ajugaanerput aamma nuannequtigaa.

- Ilimagisimanngikkaluarparput - uani unamminermiinngitsoq, Bitha Metelmann oqarpoq.

Champagneqanngitsoq

- Ukiut marluk matuma siorna aamma ajugaavugut. Taamanikkut ajugaanissarput ima qularinngitsigaarput champagnemik nassarsimalluta. Maanna taamaaliunngilagut - qatsernissaali arlaatigut pissajunnarsivoq.

- Sungiusarnitsinni qanoq pissusilersussanerluta atisalersussanerlutalu eqqartorparput. Aalajangerpugut oqaluttuaq ingasaannagu saqqummiutissallugu. Assersuutigalugu isiginnaartitsivimmi nikorfalluta Amerikamiut erfalasuannik erfalatitsigutta Trumpip sulisuinit atornerlunneqarsinnaavoq inuillu attaveqaqatigiittarfiisigut allatut isumaqalersillugu saqqummiullugu. Taakkuami kalaallit tamarmik USA-mut ilaalernissamik takorluugaqarnerannik amerikamiut qinersisartuinut upperilersitsiniaallutik qanorluunniit iliorsinnaapput, Bitha Metelmann nassuiaavoq.

- Kimigiisertoqaannassasoq aarleqqutigaara. Trumpimi qanoq iliussanersoq siumut oqaatigineqarsinnaaneq ajorpoq – piumasanilu angorusuppaa. Taamaattumik taakkunannga tatineqarneq suli annertusissaaq. Qularnanngilluinnarpoq. Tamanna ernummatigaara – taamaattumillu pingaaruteqarpoq ataatsimoornissarput qanillinaveersaarnissarpullu. Kalaallit Nunaat pisiarineqarsinnaanngilaq. Tamanna uteqattaartuartariaqarparput – qanorluunniit pisoqassagaluarpat.

Peqatigiiffik ukiuni 30-ni

- Angerlaqqaalaariarluta ajugaanitsinniit tunniaqqaalaassaagut - kingorna Aqissip ukiunik 30-nngortorsiornissaanut piareersassalluta, Benedikte Sivertsen oqarpoq.

Lollandimi Falsterimilu kalaallit peqatigiiffiat septembarip arfineq-pingajuanni 1995-imi pilersinneqarpoq.

- 1995-imi upernaakkut poorskimi naalagiareernerup kingorna naalagiaqatigiissimasut Sakskøbingimi apersortittut inaanni kaffisoqatigiipput. Ataatsimoornermi qeqertani kalaallit peqatigiiffiannik pilersitsisoqarnissaa oqaluuserineqarpoq. Arnat tallimat peqatigiiffimmik pilersitsiniarlutik aalajangerput, Bitha Metelmann oqaluttuarpoq.

- Peqatigiiffik aallaqqaataaniilli kulturikkut pikialaartitsinermik ulluni arlalinni ingerlanneqartumi aaqqissuussisarpoq, 1997-imilu erinarsoqatigiit “AQISSEQ”-mik taaguutillit pilersinneqarput. Qanga amerlasuujulluta erinarsoqatigiinnut ilaavugut, maannali pingasuinnanngornikuulluta.

- Ukiuni kingullerni peqatigiiffiit unammilligassaqarsimapput. Danmarkimi kalaallit peqatigiiffii arlallit ajoraluartumik taamaatiinnarsimapput – siulersuisunut qinigassanngortitanik amigaateqarneq amerlanertigut pissutigineqarluni. Aqisseq aamma ilaasortarpassuaqarsimavoq, ukiulli ingerlaneranni amerlasuut toqukkut qimagussimapput ilaallu ilaasortaajunnaarsimallutik.

- Uagulli triokkut suli atavugut - taamaaginnassallutalu. Nuannisaqatigiittarpugut, aamma ukiut pingasut ingerlaneranni marloriarluta Tusa-mik ajugaasimanerput nuannaarutigingaarparput. Tamanna ingerlaqqinnissatsinnut kajumissaarutigaarput, Bitha Metelmann oqarpoq.

Benedikte Sivertsen Ilulissani inunngorpoq, 1963-imili angajoqqaani ilagalugit Sakskøbingimut nuuppoq.

Bitha Metelmann Nanortalimmi inunngorpoq 1974-imilu Danmarkimut nuulluni.

Bolethe Leonhardt Paamiuneersuuvoq. 1990-ikkut qiteqqunneranni Danmarkimut nuuppoq, kingornalu Kalaallit Nunaannut uterluni. Danmarkimut 2015-imi uteqqippoq.