Februaarimi atuarneqarnerpaasimasut
Timmisartunik Kujataani qulaassisunik takunnissimanerit februaarimi Sermitsiaq.AG-mi atuarneqarnerpaasimapput. Corona nutaarsiassanut akuuallaarunnaarsimavoq, atuarneqarnerpaallu pingajuannut ilaajunnaarsimalluni.
![Februaarimi atuarneqarnerpaasimasut](https://image.sermitsiaq.ag/372195.webp?imageId=372195&width=960&height=578&format=jpg)
Corona pillugu nutaarsiassat killilersuutit atorunnaarsinneqarmata tuniluuttoqarneralu annikilliartormat atuarneqarpallaarunnaarput. Tamanna atuartartut februaarimi atuarniarlugit iserfigisimasaanni takuneqarsinnaavoq, tassa timmisartut, soraarsitsinerit ulorianartuillu ajutoornernit atuarneqarnerpaasimapput.
Qaammammi atuarneqarnerpaaq Kujataani qaqutigoortumik silaannarmi takuneqarsimasut pillugit ilanngutassiaavoq
1. Kujataani: Timmisartut arlallit takuneqartut
Tulliulluni atuarneqarnerpaasimasoq tassaavoq, kujataani angutip 25-nik ukiullip qamuteralammik ajutoorluni ajunaarsimanera pillugu ilanngutassiaq, angut ilisimanngitsoq nassaarineqarami annaanneqarsinnaasimanngilaq.
2. 25-nik ukiulik snescooterinik ajutoorluni ajunaartoq
Kommuneqarfik Sermersuumi sulisut pillugit suliat Sermitsiaq.AG-mi ukiup kingulliup ingerlanerani initungaatsiarsimapput. Februaarimi atuarneqarnerpaat pingajorisimavaat, kommunimi pisortat Lars Møller Sørensenip Hans Henrik Winter Johansenillu kommunimi piginnaatitaaffimminnik unioqqutitsisimasutut siorna politiinut unnerluutigineqarnerat pillugu ilanngutassiat saniatigut pisortap allap atorfimminnit tunuartinneqarnera pillugu ilanngutassiaq.
3. Kommuneqarfik Sermersuumi pisortaq alla aamma suliunnaarsinneqartoq