Hans Egedep eqqaassutissaa aappalaartumik qalipanneqaqqissimasoq
Nuummi nuutoqqami Hans Egedep eqqaassutissaa qalipaammik aappalaartumik qalipanneqaqqissimavoq. Politiit suliaq paasiniaaffigaat.
![Live, laugh, land back Hans Egedep eqqaassutissaanut allanneqarsimavoq.](https://image.sermitsiaq.ag/201491.webp?imageId=201491&width=960&height=512&format=jpg)
Danskit norskillu palaserisimasaat, ajoqersuiartorsimasoq Hans Egedep eqqaassutissaa Nuummi nuutoqqamiittoq qalipaammik aappalaartumik qalipanneqarsimavoq.
Kalaallit Nunaata Politiivi tusagassiorfinnut taama nalunaaruteqarput.
Kalaallit Nunaata Politiivini pigaartut aqutsisuat Sermitsiaq.AG-mut ilisimatitsivoq eqqaassutissamut serlersaarisoqarsimanera tallimanngornermi nal. 10.47 nalunaarutigineqarsimasoq.
- Politiit suliami maanna paasiniaapput, taamaattumik annertunerusumik maanna oqaaseqarsinnaanngilagut, pigaartut aqutsisuat Hans-Peter Berthelsen Sermitsiaq.AG-mut oqarpoq.
Suliaq serlersaarinertut politiinit suliarineqarpoq. Eqqaassutissami allanneqarsimavoq "Live, laugh, land back", nutserneqarsinnaasoq "Inuugit, illarit, nuna utertiguk".
Siullermiilinngilaq
Eqqaassutissaq qalipaammik aappalaartumik siullermeerluni qalipanneqalinngilaq. Nuummi innuttaasut 21 juni 2020-mi iterput Hans Egedep eqqaassutissaa aappalaartumik qalipanneqarsimasoq. Suliami inuit sisamat siullermik serlersaarisimasutut pasineqarput.
2020-mi serlersaarisoqarneranut suliaq politiit suli naammassinngilaat. Takunnittutummi oqaloqatigineqartussaq ataaseq nunami allami najugaqarpoq. Politiillu serlersaarinermut tunngatillugu nutaamik maanna suliaqalerput.
Hans Egedep eqqaassutissaa 2012-mi aamma 1977-imi aamma serlersaarfigineqarluni qalipanneqarnikuusimavoq.
Innuttaasut suliamut ilisimasaqarsinnaasut politiinut, oqarasuaat 70 14 48-mut attaveqaqquneqarput.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...