Højskolit mianersoqqusipput
Nunatsinnit højskolinut tapiissutit appertinneqassappata itamanna inuusuttunut ilinniaqqinnissaminnut piukkunnarsartunut ajoqutaassasoq, højskolit siulittaasui marluusut isumaqarput.
- Knud Rasmussenip Højskolianut Sulisartullu Højskoliannut tapiissutit attornasigit, siulittaasut Kathrine Larsen Lennert aamma Jess G. Berthelsen Inatsisartunut ammasunik allagaqarlutik qinnuiginnipput.
Siulittaasut tusatsiarsimavaat Inatsisartut ataatsimiititaliaasa arlaanni højskolinut tapiissutit apparniarneqanngikkunik peerniarneqartut.
- Taamaaliorneq ajortuliornerussaaq. Tapiissutit ukiut 25-t ingerlaneranni ima naleerussimatigaat allaat 3 mio. kr.-int tikingajallugit millisimallutik, siulittaasut allapput.
Akerlianik kissaatigaat højskolit nutarneqarnissaannut Inatsisartut tapiissuteqassasut.
- Højskolit periarfissaqanngillat Namminersorneullutik Oqartussat aserfallatsaaliuinermut aningaasaateqarfiannit aningaasanik pissarsissallutik, ukiullu amerlanngitsut qaangiupppata højskolit ima aserfallassimatigissapput allaat najugaqarfittut naleqqukkunnaarsimassallutik, højskolit siulittaasui Kathrine Larsen Lennert aamma Jess G. Berthelsen allapput.
Taakku oqaasii naapertussagaanni højskolernirlutik qinnuteqartartut amerligaluttuinnarput.
- Ukiuni kingullerni qinnuteqartartut amerlasoorujussuanngorsimapput. Nalinginnaalluinnalersimavoq inissanut 20-nut 200-t angullugit qinnuteqartarlutik.
Højskolit namminneq aningaasarsiorumallutik unnuisarfiit unammillerlugit ininik attartortitsisarput.
- Pissusissamisoortutut akuerineqarpoq assersuutigalugu takornariartitsinerup iluani unnuisarfittut ingerlatsinerput, taamaaliortariaqarpugullu aningaasaqarnikkut patajaannerusumik ingerlajumalluta, højskolit siulittaasui allapput.