Ia orana: Takorluukkani ornigassaqqissoq
Aappariit soraarninngornerit takummaaffiulluartumik Tahitimi ataatsimooqqilerput. Matumani Dorthe aamma Jens-Erik ungasissumut angalaneq takorluukkanillu angisuunik piviusunngortitsineq pillugu ataatsimoorussamik angalanilersaarutiminnik allapput.
Ullumi tallimanngorneq 21. april, ullullu arfinilissaat maaneereerpunga, Tahitimi illoqarfiit annersaanni Pape’etemi. Siornali Jensi aallarmalli maani naapinnissaa pilersaarutaavoq, maanngaanniillu ornigassatta pingaarnersaat Påskip Qeqertaa juulip missaani tikissavarput.
Aviisi AG-mi nutaami taama allaaserinnittoqarpoq.
Ornigassara ungaseqimmat pilersaarusiorluartariaqarpunga. Qujanartumillu Taavani Rejser ikiorluaqaanga, taassumami Nuummiit maanga billettissara isumagaa toqqissisimanarluinnartumik. Amerika aqqusaarniaraanni ESTA-mik, tassa Amerikamut isersinnaanermik akuersissut pigisariaqarpat, 72 tiimit sioqqullugit qarasaasiakkut immersorneqassaaq akilerneqarlunilu, aatsaallu taanna pigigaanni Amerikamut isersinnaalissaatit.
Nuummiit aallarpunga 12. april Københavnimut, ingerlaqqillungalu 14-iani Kastrupimiit Helsinkimut. Ingerlaqqippunga Los Angelesimut, tassanilu 11t 20m timmisartorlunga, Kullorsuaq qulaallugu. Taamannak sivisuumik timmisartornikuunnginnama pissangalaarpunga oqinaaqaaralu. Taamannak timmisartorniaraanni avatinik aalatitsillattaarnissaq pingaaruteqaqaaq, aammalu sukangasuunik alerseqarnissaq (kompressionsstrømper), isikkat pullannginnissaat anguniarlugu. Aqqutaani arlaleriarluta nerivugut, imermillu pajunneqallattaavugut, saniatigullu imigassanik kimittuunik piniaraanni pisiarineqarsinnaallutik.
Los Angelesimut tikikkatta, soorlu uiverfissuarmut pilluni, tassalu inuit amerlangaarmata allamiorpassuit, Qujanartumillu 6 timit uninngasussaagama, eqqissiivillunga aallarfissara paasiniarpara, kufferteralu isumagalugu.
Naasunik niaqorut
Maannartussat utaqqeqatigilerakkit, qassinik qungujunnerpunga, tassalu ilaaqatissama ilaat ”ilisarnangaarmata”. Inuit anngajaajupput simertut, kalaallinut assingusinnaallutik, assullu inussiarnerput, ingammik utoqqartaat. Taakkulu Tahitimiusut ilassisarput ”Ia orana” tassa inuugujoq.
Los Angelesimiit ingerlaqqippugut 23.55, timmisartorsuaq ulikkaavillugu. Tassanilu 8 tiimit ingerlasussaagatta aqqutaa merserilaarlugu. Tinginiariaratta nerisassanik sassaallerput, nerilaariaramalu sinilaarsimavunga. Ilaaqatikka tamarmik sinngupput. Ilaqutariit mikisunik meerartallit arlalippaaluit ilaapput, taakkulu naammagittaqaat. Tikitassara pissangaginermik 2 timinnaat sinippunga, sinneralu filmerlungalu atuarpunga. Skærmikkut malinnaasinnaavugut sumut killinnitsinnik, tiimillu qassit qaangiuppata tikinnissatsinnik. Tikitsinnata aamma ullaakkorsiutinik sassaallerfigineqarpugut, kaffilu mamaqaaq, naak ullaakkut kaffisortanngikkaluarlunga. Taamaalluta meqaagut, misigilerpungalu assakka pattalaarlugit, annakkuummimik ilallugu, tassami tikiinnaqaanga, 25 timit, Nunatsinniit Danmarkimut angalanera ilanngullugu timmisartoreerlunga.
Aviisimi AG-mi atuarnerusinnaavutit. Aviisi uani pissarsiariuk:
