Ilagiit oqartussaaqataanerussapput
Ilagiinnut ilaasortaaneq tapersersorneqartorujussuuvoq – ilagiit sinniisaat ilaasortassaaleqipput.
Ilagiinni imminut akerliusumik pisoqarpoq.
Kalaallit Nunaanni innuttaasut 95 procentii ilagiinnut ilaasortaapput, naalagaaffeqatigiinni amerlanersaallutik. Danmarkimi innuttaasut 74 procentii, Savalimmiunilu 80 procentii ilagiinnut ilaasortaapput, aviisi Sermitsiaq allappoq.
Apriililli arfernanni ilagiit sinniisaannut qinersisoqarmat illoqarfinni nunaqarfinnilu amerlasuuni ilagiit sinniisaannut qinersinertaqanngitsumik qinersisoqarpoq; qinigassanngortittoqarsimannginnera pissutigalugu, imaluunniit ilaasortassat amerlaqatigilluinnagaannik qinigassanngortittoqarsimammat.
Inatsisilerituup Morten Nornildip, ullumikkut Naalagaaffiup Sinniisoqarfiani pisortap tulliata, Kalaallit Nunaannilu biskoppeqarfimmi allaffiup pisortaata siullersarisimasaata, atuakkiami nutaami »Tro og Samfund i Grønland - i 300 året for Hans Egedes ankomst« »Upperisaq inuiaqatigiillu - Hans Egede-p Inuit Nunnaannut tikinneraniit ukiut untritillit pingasunngorneranni« nunatsinni pisinnaatitaaffiat sammivaa.
Morten Nornildip ilagiinni imminut akerliusoqarnera tamanna qaangerniarlugu ilagiit sinniisaasa allanngortinneqarnisaa ujartorpaa.
– Ilagiinni oqartussaaqataaneq tamanna ullumikkut ilagiit pisinnaatitaaffiinut ajornartorsiutaasutut oqaatigineqarsinnaavoq.
Qinersineq qinersinernit allanit ipitinneqarpoq
1948-miit 1950-imut Kalaallit Nunaannut Ataatsimiititaliarsuup ilagiinni sinniisoqarneq eqquppaa.
Tamanna tikillugu oqaluffimmut tunngasut palasip ajoqillu isumagisarsimavaat, ilagiit atuisutuinnaq inissisimallutik. Kalaallit Nunaannut Ataatsimiititaliarsuup siunnersuutigaa inuit sinniisoqalissasut ilagiinni inuuneq oqaluffimmilu pissutsinik soqutiginninneq nukittorsarniarlugu – soorlu angajoqqaat sinniisuisa atuarfimmik soqutiginninneq nukittorsartussaasimagaat.
Ataatsimiititaliarsuaq aamma ilagiinnut sinniisunik qinersinerup qanoq ingerlanneqartarnissaanik inassuteqarpoq:
– Siunnersuutigineqarpoq qinersineq pisassasoq ilagiinnik ataatsimiititsinermi, tamannalu nalunaarutigineqartassaaq kommunerådimut qinersinerup kingorna naalagiarnermi siullermi palasip oqaluussinerani, taamaasilluni sinniisut piffissaq qinigaaffiat kommunerådimut qinigaaffiup takissusianut naapertuutissammat.