Ilisarisimaneqarluartoq ICC-mi siulittaasutut uteqqittoq
Hjalmar Dahl ICC Kalaallit Nunaanni siulittaasussatut qinerneqarpoq, taamaasillunilu Kuupik V. Kleist aprilimi tunuartoq taarserlugu. Suleqatigiinnerup nukittorsanissaanut suleqataassaanga, oqarpoq.
ICC Kalaallit Nunaat atorfimmik misilittagaqarluartumik siulittaasortaarpoq. Kuupik V. Kleistimmi siulittaasutut tunuarnerata kingorna, Hjalmar Dahl qinigaanermini siulittaasunngoqqippoq. Taamaasilluni Hjalmar Dahlip paarlatsigisimasani maanna paarlaqqippaa.
ICC Kalaallit Nunaat ilisimatitsivoq Hjalmar Dahl aallartitat immikkut ittumik 27. maj ataatsimiinneranni siulittaasutut qinigaasoq.
- ICC Kalaallit Nunaata siulittaasussatut sassarpunga, naggueqatigiit Inuit suleqatigiinnerannik suli tapersersuisuugama, suleqatigiinnitsinnillu suli nukittorsaaqataarusukkama, piffissaqarlungalu. Taamaattumik ICC Kalaallit Nunaata aallartitaannit siulittaasutut ikkuteqqinissannut tapersersorneqara nuannaarutigeqaara, ICC Kalaallit Nunaanni siulittaasunngortoq, Hjalmar Dahl oqarpoq nangillunilu:
- Piffissami matumani pissanganartumi ulapiffioqisumilu, pingaartumik ICC-mi siulitaasuutitaqarnitta nalaani tapersersuisuullunga suleqataanissara qilanaaraara,
Hjalmar Dahl siulittaasunngornermi kingorna oqarpoq.
Ilisimasat misilittakkallu utertut
Sara Olsvig, ICC-mi siulittaasutut 2022-mili inissisimasup nuannaarutigaa inuk nukittooq siulittaasunngormat:
- ICC Kalaallit Nunaannut pingaartuuvoq nukittuunik sulisoqarnissaq, allaffeqarfimmi minnerunngitsumillu siuttoqarnikkut. Aningaasaqarnerput pitsanngortipparput aqutsilluarnikkut aaqqissuussaanikkullu. Tamanna pivoq aasaq siulittaasuutitaqalernitta kingunerisaanik. Siorna juulimi ataatsimeersuarnitsinnit, ICC-ip aallartitaasa suliakkiissutaat annertuut massakkut piviusunngortissallugit qilanaarpugut, ICC-p siulittaasua, Sara Olsvig oqarpoq.
Hjalmar Dahl ICC Kalaallit Nunaanni siulittaasooreerpoq 2018-imiit 2022-mut.
ICC Kalaallit Nunaanni siulersuisut ukuulerput:
- Siulittaasoq Hjalmar Dahl
- Siulittaasup tullia Nikkulaat Jeremiassen, KNAPK-mit aallartitaq
- Siulersuisunut ilaasortaq Kathrine Bødker, ICC-mi nunani tamalaani ilaasortaq, Inuit pisinnaatitaafiisa Siunnersuisoqatigiiffiaaniit aallartitaq
- Siulersuisunut ilaasortaq Qulutannguaq Berthelsen, ICC Kalaallit Nunaanni aallartitat siulittaasuat, SIK-mit aallartitaq.
- Siulersuisunut ilaasortaq Emma Lennert, SORLAK-mit aallartitaq
ICC-p siulittaasua, Sara Olsvig siulersuisunut ilaasortaavoq, taasisinnaatitaananili.