Ilisimaneqalerneq: Ataqqinaatigalugulu tulluusimaarutigaara
Assilialiortoq Martin Brandt Hansenip eqqumiitsuliai arfineq-marluk Ishøjimi katersugaasivimmi Arkenimi saqqummersinneqarput. „Kalaallit Nunaanni eqqumiitsuliornermik oqaluttuarisaanermi pisoq pingaarutilittut isigaara,“ eqqumiitsuliortoq Nuummi peroriartorsimasoq oqarpoq.
Eqqumiitsulianik katersugaasiviup tusaamasap Arkenip Ny Carlsberg Fondet-imit eqqumiitsuliat arfineq-marluk eqqumiitsuliortup Martin Brandt Hansenip saqqummersitai „Group Therapy – Ny Samtidskunst“ pisiarai.
Eqqumiitsuliat katersugaataasut sisamanngorpat februaarip 29-anniit Arkenimi takuneqarsinnaalissapput.
- Arken tassaavoq eqqumiitsulianik nutaaliaasunik katersugaasivik nunani tamalaani ataqqineqarluartoq, Skandinaviamilu eqqumiitsulianik nutaaliaasunik katersugaasiviit pitsaanerpaat ilaat. Taamaattumik suliannik pisiniarlutik isertartunullu amerlasuunut takutinniarlugit aalajangersimanerat ataqqinaatigalugulu tulluusimaarutigaara, Martin Brandt Hansen Sermitsiaq.AG-mut oqarpoq.
Ilinniagaq
1990-imi inunngorpoq, Nuummi peroriartorpoq aamma Det Kgl. Danske Kunstakademip eqqumiitsuliornermik ilinniarfiata qiperukkalerinermik ilinniarfiani ilinniarnikuuvoq.
Allaaserisap matumap siuliani nassuiarneqarnikuuvoq Martin Brandt Hansen qiperuisartuusoq, kitaamiut eqqumiitsuliornerisa oqaluttuarisaanerannik, inuit oqaluttuatoqaannik inuillu pissusiinik misissuinermik atuillunilu qiperuisartuusoq.
- Fine Arts-imi Mastereqarpunga (cand.art.perit) tamannalu isumaqarpoq inuussutissarsiutigalugu eqqumiitsuliortutut taaneqarsinnaasunga, eqqumiitsuliallu assigiinngitsut tamaasa suliarisinnaavakka, ilisimatitsivoq.
Eqqumiitsulianit arfineq-marluusunit arfinillit katersugaasivimmiup skaaviini saqqummersinneqarput, eqqumiitsuliarlu kingulleq tassaavoq aquuteralak takulertornartorujussuaq, katersugaasiviup inaataani saqquminerpaasoq.