Ilisimatusarfik navianartorsiorpoq
Naalakkersuisut Inatsisartullu ilinniartitaanermut ataatsimiititaliaanni amerlanerussuteqartut aalajangiisuussappata Ilisimatusarfiup pisortaasa ilisimatuutut misissuinermik misilittagaqarnissaat piumasaqaataajunnaassaaq.
Tamanna Ilisimatusarfiup pitsaassusianut, ilisimatusarfittut ataqqineqarneranullu nunanilu tamalaani suleqatinit isigineqarnermut kinguariaaterujussuussasoq, ilisimatuutu universitetini assigiinngitsununeersut Sermitsiap oqaloqatigisimasai isumaqarput. (Takukkit allaaserisat allat).
Ilisimatusarfiup aqunneqarnerata allannguutissaanik siunnersuutip Inatsisartuni marloriarluni suliarineqarnerani naalakkersuisut namminneq tunngavilersuutigigaluarpaat Ilisimatusarfiup pisortaasa misissuinermik misilittaqartuunissaat assut pingaaruteqartoq.
Misissuinermik misilittagallit
Inatsisissap saqqummiunneqarnera allassimavoq “rektorip (tullersortaatalu, rektorip peqannginnerani taartaasarami, red.) akuerineqarsimalluni ilisimatuujunissaanik piumasaqaat universitetit silarsuaanni nalinginnaasumik atuuppoq, Ilisimatusarfiullu pimoorussamik piginnaasaqarluarlunilu Issittumi ilisimatusarnermik ilinniartitsinermillu ingerlatsiviuneranik nunarsuaq tamakkerlugu tusaamaneqarnerata attatiinnarneqarnissaanut ikorfartueqataasuulluni”.
Allannguinerujussuaq
Inatsiartulli kultureqarnermut ilinniartitaanermullu ataatsimiititaliaata akuliunneratigut piumasaqaatit appariarujussuartussanngorput. Ataatsimiititaliami amerlanerussuteqartut allannguutissatut siunnersuutigaat pisortat ilisimatuutut misissuinermik misilittagaqartuunissaat akuerisaanissaallu peerneqassasut, taarsiullugulu “inuit Kalaallit Nunaanni pissutsinik ilisimasaqarluartut naammaginartumillu ilinniagallit salliutinneqarnissaat qulakkeerneqassasoq”.
– Tamana 180 gradinik muminneruvoq, paasiuminaatsilluinnarparalu, Ilisimatusarfiup massakkut pisortarisaa Ole Marquardt oqarpoq.
Sermitsiami atuaruk...
Aamma atuakkit nunani avannarlerni universitetini pisortat isummersornerat....