Ilisimatusarneq: Kalaallit Nunaanni orpiit nerisassaqarniarnermi ajornartoornermut ikiuutaasinnaasut
Silap pissusiata allanngoriartorneranut pinngortitaq malinnaasinnaajunnaaraluttuinnarmat naatitsiniarneq ajornartorsiutaaneruleriartorpoq, nerisassaqarniarnerlu ajornarsiartussalluni. Orpilli nunatsinni naasarsimasut nalimmassallaqqinnerat iluaqutaasinnaasoq, ilisimatusartoq isumaqarpoq.
Silap pissusaata allanngoriartornera pinngortitap malinnaaffigiuminaatsippaa. Tamassuma kinguneraa naatitsiniartarneq annikilliartortoq. Siunissaq eqqarsaatigalugu nunarsuup ilarujussuani nerisassaqarniarnermut ajornerulersitsisinnaavoq.
Nunarsuarmili nerisassaqarniarnermi naatitsisarnermut, Kalaallit Nunaanniit aaqqiissummik nassaartoqarsinnaasoq, ilisimatusartoq isumaqarpoq.
Ilisimatusartoq Eske Willerslev, arctichub.gl-imi nassuiaavoq Tunup avannaarsuani orpiit naasarsimasut naasorissaasunut maanna iluaqutaasinnaasut. Taanna Københavns Universitetimi professoriuvoq Centre of Excellence in GeoGeneticsimilu directoriulluni.
Orpiit sananeqaataat aaqqiissutaasinnaapput
Eske Willerslev Tunup avannaani 2 milliuunit matuma siorna orpiit poppelip naasarsimasut pillugit ilisimatusarpoq. Sila kissannerugaluaraangalluunniit, orpiit poppelit qaammaterpassuarni seqineqarfiunngitsumi suli naajartortarsimapput. Sumiiffik orpeqarfiusimasoq maanna naasoqanngilaq. Orpiilli naajartortarsimasut sananeqaataat maanna misissorneqarput, qaamanikinnerusumi naasinnaaneri paasiniarneqarlutik.
Ilisimatusartoq isumaqarpoq orpiit naajartorsinnaanermut sananeqaataat naasorissaasuni naatitsinermut atorsinnaassasut, naatitsisarnerit ilungersunannginnerulersillugit. Orpiimmi naajartorsinnaasut, atugassarititaasut ilungersunarluinnaraluarpataluunniit, iluaqutaasinnaapput.
- Maani Issittumi seqineq appasissorujussuusarpoq. Taamaattumik naasut seqernup qinngornerinik tigooraalluarnerusarput, seqinninnginnerusarmat, Eske Willerslev oqarpoq.
- Sananeqaat allanngortoq taanna soqutiginaqaaq, imaassinnaavormi inerittut sumiiffinni allani – sivikinnerusumik seqinnerfiusartuni – naatinneqarsinnaasut, Eske Willerslev arctichub.gl-imut oqarpoq.