Ilitsersuisut nutaat: Meeqqat uippakajaartarnerannut sioorasarnerannullu tuluit periusaat iluaqutaasinnaasoq
Nunarput meeqqat inunnguutsiminnik peqqissusaannut tatisussusaannullu maanna ilitsersuisoqalerpoq. Christina Hardenberg aamma Linda Madsen, meeqqat inuusuttullu 9-nik 18-inut ukiulinnut eqqarsartaatsimikkut peqqissusaannut ilitsersuisutut Tuluit Nunaanni nittartakkakkut ilinniagaqarsimapput.
Meeqqat inunnguutsiminnik peqqissusaat suua? Christina Hardenbergip aamma Linda Madsenip tamanna paasisaqarfigaat. Tassami iheart facilitatorinngorput, meeqqat inuusuttullu eqqarsartaatsimikkut peqqissusaannik, tatitussusaannik aamma ineriartornissamut periarfissaannik tamakkiisumik peqqinnartumillu allanngornissamik paasititsinissamik siunertaqartumik.
- Meeqqat sammisanik assigiinngitsunik ilinniartittarpagut. Assersuutigalugu eqqarsarpallaarneq. Tassani qulequtaq sammineqartoq, eqqarsarpallaarnerlu qanoq pilersinneqartarnersoq ilinniartitsissutigineqartarpoq, tassanilu ilinniartitsinermi meeqqat sukkasuumik paasilertarpaat, eqqarsaatit namminerminnut ikiorsiissutaanngitsut iperarneqarsinnaanersut, Christina Hardenberg, Sermitsiaq.AG-mut nassuiaavoq.
Ilinniartitsineq pinaveersaartitsiniarneruvoq. Taamaattumillu tamanut, soorlu meeqqat atuarfianni, ilinniarfinni, timersortartut peqatigiiffiini aammattaaq angajoqqaanut neqeroorutigineqarsinnaavoq. Tuluit Nunaanni misissuinerup takutippaa, meeqqat iheartimik nalerisimaarnermik ilinniartinneqarsimagaangata, takkutinngitsoortarnerat 59 procentinik appariartartoq.
Eqqarsartaatsikkut peqqissutsip atuartitsissutiginissaa pingaaruteqartoq
Christina Hardenberg aamma Linda Madsen meeqqanik inuusuttunillu ilinniartitsinissamut 16. januar allagartartaarput. Meeqqat inuusuttullu atuartitsineq iluaqutigisinnaagaat isumaqarput, immaqalu aamma siunissaannut sunniuteqarsinnaasoq.
- Meerartatsinnut inuusuttortatsinnullu eqqarsartaatsikkut peqqissuserput pillugu ilinniartitsisarnermik amigaateqarluta isumaqarpugut. Eqqarsartaatsikkut imminnut paasilluarnerunissaannik sakkussanik tunisinnaagutsigit, taava meeqqat aamma inuunerminni inersimasunngornermilu peqqinnarnerusumik ingerlasinnaassapput, Christina Hardenberg oqarpoq.
Meeqqat imminut tatiginertik pitsaanerulersittarpaat
Iheartip tunngavii ilinniartitseriaasiupput nutaat, taakku Tuluit Nunaanni atorneqartarput. Piffissami matumani nunarsuaq tamakkerlugu ilitsersuisut 600-upput, Danmarkimi sisamaallutik Kalaallit Nunaanni marluusut. Meeqqat inunnguutsiminnik peqqissutsiminnik tatitussutsiminnillu ilinniartinneqarnerup kingorna, 98 procentiisa inuttut atuarnikkullu pitsaasumik ineriartorneq malugisaraat, iheartip misissuinerata takutippaa.
- Meeqqat taamatut ilinniartinneqarnerup kingorna qaamanerusumik ersarinnerusumillu eqqarsalertarnerat, misissuinerit takutippaat. Meeqqat akuunerulertarput, inuunermilu unammilligassat qaangernissaannut paasisaqarnerulertarlutik, misigissutsillu tamaasa atornissaannut pikkorinnerulertarput, misigissutsit nuannernerusut nuanniinnerusullu, Christina Hardenberg oqarpoq.
Meeqqat inuusuttullu akornanni inunnguutsiminnik peqqissusaannik tatitussusaannillu atuartitsisarneq Tuluit Nunaanni nunanilu allani iluatsilluarsimavoq. Kalaallit Nunaanni pinaveersaartitsinermik suliaqarnermi Christinap Lindallu iluaqutaasinnaanissartik neriuutigaat.
- Eqqarsartaatsitta qanoq piviusumik sulisarnera meeqqanut eqqissisimalersitsisarpoq. Tamanna uippakajaarnermik, siooranermi, annilaanganermik minnerunngitsumillu inuunermi kiserliornermik annikillisitseqataasinnaavoq. Iheartimik ilitsersuinermik meeqqanik ilinniartitsisinnaasuni marluulluta siulliuvugut, ulluinnarnilu inuunerannik nalerisimaarnerulersitsisinnaasut, tamannalu tulluusimaarutigeqaarput. Kikkut tamarmik meerartallit inuusuttortallillu ilisimasavut atorluarumaaraat neriuutigaarput, Christina Hardenberg naggasiivoq.