Illutoqqat suli pingaartippavut
Nutaaliornerit soorlu atueqqiineq atorluaallunilu sananeq ukiuni hunnorujulikkaani Kalaallit Nunaanni atorneqarsimavoq.
Allaaserisani arlaqartuni Sermitsiap nunami ammasumi illukut qimatat sammisimavai; kingullermik Nuup eqqaani nunaqarfiusimasumi Kangermi qatanngutigiinniat oqaluffitoqaat.
Internetimi aviisimi oqaaseqaatini oqaluffiup oqaluttuarisaanermut pingaarutillip nutarternissaanik siunnersuut mamiagineqarpoq: Inissiat asiulerlutillu oqoqartut tamaasa nutarterinermi ilaatitsigit!
Aviisi Sermitsiaq taama allappoq.
Iluarsaassinissamilli kinguaattoorneq qangarsuarli inornartumut anngutereersimavoq: Naalakkersuisut kinguaattoorneq namminneq 7,6 milliard koruuninik naleqassasoq naatsorsorsimavaat, taakkunannga Namminersorlutik Oqartussat kommunillu inissiaanni attartortittakkani iluarsaassinissamut kinguaattoorneq 2,5 milliard koruuneqartoq.
Nunatta Katersugaasiviani Toqqorsivianilu katersugaasivimmi inspektøri Inge Bisgaard illuutinik eqqissisimatitanik suliaqarpoq.
- Sooq illuutitoqqat eriagissavavut, inunnut inuusunut inissiat iluarsaannissaat akissaqartinnaguluunniit?
- Kinguaariinnit siulitsinnit nunarput kingornussimavarput, kinaassutsitta kulturittalu ilaat pingaarutillit sumiiffinnut illuutinullu attuumapput. Oqaluttuarisaanitsinni amigaaterpassuaqassaagut najugaqarfiit ilullu taakku inuit siulitta inuuffigisimasaat takuniarsinnaajunnaarutsigit, Inge Bisgaard Sermitsiamut oqarpoq.
Aviisimi Sermitsiami atuarnerusinnaavutit. Aviisi uani pissarsiariuk:
