Immiaaqqanik ussassaarut Small Times Giants-ikkut ajuallaatigaat
Tuborg Grønlandip siumut isumaqatigiissuteqarani Small Times Giants niuernermut atatillugu atorpai. Tamanna nipilersoqatigiit, Nanoq Beer-imik mamarisallit, ajuallaatigaat
Small Times Giants sapaatip akunnerani kingullermi Danmarkimi Roskilde Festivalimi nipilersorngaarnerat iluatsillugu Tuborg Grønlandip Facebook-imi atuisartuni kajumissaarpai Tuborg-itortaqqullugit.
- Small Times Giants aqqutaani ajutuulaarlutik Roskilde Festivalimi tusarnaartitsisartorput. Tamatumunnga Tuborg pisariaqarpoq. Like tooruk nukappissat tusarnaartitsilluarnissaat kissaatigigukku. Skål!!, Tuborg Grønland Facebook-imi quppernermini allappoq.
Tamannalu Small Time Giants-ikkut tupigusuutigaat.
- Nipilersoqatigiit sinnerlugit oqaatigisinnaavara tupaallaatigigatsigu nipilersoqatigiittut aterput ussassaarummi atorneqarmat Tuborg-itoqqusilluni kajumissaarummi, Roskilde Festivalimi nipilersornermut nalliussiniarlugu. Matumani oqaatigineqassaaq Tuborg Grønland siusinnerusukkut suleqatigisimanngisaannaratsigu attaveqarfigisimanngisaannarlugulu, Miki Jensen Small Times Giants-imeersoq Sermitsiaq.AG-mut oqarpoq.
Mianernartoq
- Ajuallaatigisatuaraarput nipilersornitsigut takorluukkatta ilagimmassuk Danmarkimi kalaalerpassuarnik ataasiinnarmik isiginninnerup akiorniarnera. Tamatumani soorunami mianernarpoq nipilersoqatigiittut atitta akueriteqqaarata immiaaraliorfissuarmut atatillugu atorneqarnera, Miki Jensen oqarpoq, erseqqissarpaali nipilersoqatigiit tulluusimaarutigigaat tusarnaartartuminniunngitsoq allanissaaq nipilersoqatigiit nipilersugaasa maluginiarneqarsimanerat.
- Siunissami pingaartilluassavarput niuernermut atatillugu aterput atorniarneqassappat akulerutsinneqarnissarput, Miki Jensen oqarpoq, taassumalu erseqqissarpaa nipilersoqatigiit Tuborg imigannaarinngilluinnaraat.
- Immiaaqqamik kajumissaarissagutta inuit inakkusuppavut kujataani immiaaraliaq Nanoq Beer, atilik Nanook, misileqqullugu, mamassusaa Tuborg-iminngarnit alutornarneroqimmat. Tassa nunatta ernganik, tarninganik asanninneranillu sananeqarsimammat. Taanna piumaneruarput, Miki Jensen qungujulluni oqarpoq.