Inatsisartut akiliuteqartalernissaq tapersersorpaat
KNR-imut akiliuteqartalernissap eqqunneqarnissaa inatsisartuni amerlanerusunit tapersersorneqarunarpoq. Tamanna pingasunngornermi oqallinnermi erserpoq.
Oqallinneq josef Motzfeldtip IA-meersup siunnersuutaanit aallaaveqarpoq, taassuma KNR-i suliffeqarfittut imminut pigisitut allanngortinneqassappat partiit qanoq isumaqarnersut paaserusuppaa.
Motzfeldt isumaqarpoq, namminersornerullutik oqartussaniit kaanngarnikkut radio-tv-qarfik tamatigoortumik tusagassiortuusoq eqaannerusumik ingerlanneqarsinnaalernissaanut aqqutissiuussisinnaasoq.
Naalakkeruisut aamma KNR-ip piginnittuuneranut tunngasortaata allanngortinneqarnissaa ammaffigaat, naalakkersuisunut ilaasortaq Aqqalu Abelsen naalakkersuisunut ilaasortamut Tommy Marø-mut taartaagallartoq oqarpoq, kisianni naalakkersuisut isummamik erseqqissumik saqqummiussaqanngillat.
Kulturimut naalakkersuisoqarfiup ataani ataatsimiitsitaliap maannakkorpiaq KNR-ip ingerlanneqarnera qulaajaleruttorpaat, suliarlu taanna naalakkersuisut allatut iliuuseqalertinnatik utaqqeqqaarniarpaat. Kisianni Aqqalu Abelsen neriorsuivoq, akiuteqartalernissamut tunngasoq suleqatigiissitap suliaanut ilanngunneqassasoq.
Tassami atuisartunit akiliuteqartalernissap eqqunneqarsinnaanera aaqqiissutaasinnaasoq amerlanerussuteqartut tapersersorpaat. Partiit aamma isumaqatigiissutigisorujussuuaat, KNR-ip pitsaassusaa - nutaarsiassatigut aliikkutassatigullu - suli pitsanngornerujussuusinnaagaluarpat.
- KNR-ip tamatigoortumik innuttaasunut aallakaatitsisartutut pisussaaffigaa, paasissutissiisarnissaq, aliikkutassaqartitsinissaq inuillu misigissusaanik eqquisussaq, taamaalillutik inuit iliuuseqarnissamut kajumissuseqalissammata. Kisianni misigissutsit saqqummersartut akuttunngitsumik tassaasarput uumitsannerit pakatsinerillu, Josef motzfeldt oqarpoq.