Ingerlatsiviup Danske Taler-ip kalaallisut savalimmiormiusullu oqalugiutit katersortalissavai
Aki-Matilda Høegh-Dam Årets Danske Tale-mit Folketingimi upernaakkut 2023-mi ammaanersiornermi oqalugiutigisani pillugu nersornaaserneqarpoq. Ingerlatsiviup kalaallisut oqalugiutit katersulissallugit aalajangerpoq.
Ingerlatsivik Danske Taler, qallunaat oqalugiaataannik pingaaruteqartunik katersisartoq aalajangerpoq kalaallisut savalimmiormiutullu oqalugiaatit katersulissallugit aalajangerpoq.
Aki-Matilda Høegh-Dam (S) Folketingimi majimi oqalugiutaa pillugu nersornaasiinermut atatillugu Danske Taler taama tusagassiorfinnut nalunaaruteqarpoq.
- Oqalugiaat oqaluttuarisaanermi pingaaruteqartutut inissippoq, Folketingimi Siulittaasoqarfik qaammatialunnguit qaangiunnerini aalajangermat Kalaallit Nunaannit aamma Savalimmiunit ilaasortat Folketingimi oqaluttarfimmit oqaatsitik atorlugit oqalugiarsinnaanerat akuersissutigigamikkut, tunngavilersuutigineqarpoq.
Oqalugiutit Naalagaaffeqatigiinni naligiittut
Danske Talerip kalaallisut aamma savalimmiormiusut oqalugiaatinik katersisalernissaat Namminersorlutik Oqartussanit aallartitaqarfiup pisortaanit nuannaarutigineqarpoq:
- Danske Talerip siunertaa, tassa kalaallisut oqalugiaatinik katilersilernissaq, Kalaallit Nunaata Danmarkillu ataqatigiinneranni allannguutinut pitsaasunut ersiutaavoq. Ataqatigiinnermi taama ittumi naligiinneq ataqqeqatigiinnerlu pingaaruteqarluinnarput, Namminersorlutik Oqartussani aallartitaqarfimmi pisortaq, Jens Heinrich oqarpoq.
Anguniagaq Savalimmiunit aamma taperserneqarpoq:
- Savalimmiusut oqalugiutit naalagaaffimmi tamarmi pissarsiariuminartunngortillugit suleqatigiinnissamik isumaqatigiissuteqarnermi savalimmiunit oqalugiutit oqaluttuarisaanermi katersorneqartutut inissinneqarnerat pitsaasuuvoq, naalagaaffeqatigiinnerup ataqatigiinnera nukittorsarneqarpoq, Savalimmiuni aallartitaqarfimmi pisortaq, Jóannes V. Hansen oqarpoq.
Oqalugiutit oqaatsit apeqqutaatinnagit pingaaruteqarput
Aki-Matilda Høegh-Damip nersornaaserneqarnermini qujassuteqarpoq. Nersornaat oqalugiutinik allannermillu ataatsimeersuartoqarnermi Logografimi marlunngornermi 7. november tunniunneqarpoq. Folketingimi ilaasortap erseqqissarpaa oqalugiut naalagaaffeqatigiinnermi assigiinngitsumik pissuseqartoqarneranik oqariartuuteqartoq.
- Qujanaq, takutipparsi inuusuttut kalaallisut oqaaseqartuullutik nersornaaserneqarnissaminnut aamma naleqartut, Aki-Matilda Høegh-Dam qujassuteqarlutik oqalugiummini oqarpoq.