Inuiattut Ullorsiorneq aallartinneqarpoq
Odensemi Kalaallit Illuutaat inuiattut ullorsiorneq nalliussiniarlugu ullaakkorsiornermut qaaqqusimmat inuppassuit takkupput
Inuiattut ileqqorissuuneq naleqassutsillu ullumikkut pingaartinneqarluarput. Aamma nerisassatigut tamanna takuneqarsinnaavoq. Odensemi Kalaallit Illuutaat kapisilinnik, raajanik, qaleralinnik illinnartunillu allanik sassaallerpoq. Tamakkua inuit takkuttut 150-200-t mamarsaatigaat, ullaap tungaani Illup inuiattut ullorsiornermi sammisaqartitsinini aallartimmagu.
Nereqatigiinnerup kingorna Odense Rådhusimut ingerlaaqatigiittoqarpoq, tassani rådmand Peter Rahbæk Juel aammalu AVALAK Odensemi - kalaallit Odensemi ilinniagaqartut peqatigiiffianni - siulittaasoq Maliina L. Lyberth oqalugiarlutik.
Kingorna nalliuttorsiornermit Kalaallit Illuutaanni nanginneqarput, tassani Nunatsinni Kommuneqarfiit Kattuffianni (KANUKOKA-mi) siulittaasoq Martha Ablsen aamma Thue Christiansen oqalugiarlutik, Thue Christiansenilu aamma Illumi saqqummersitsilluni. Tamatuma kingorna lagkagemik sassaallertoqarpoq, erinarsortoqarluni qittattoqassallunilu Christian Søgaards Trio nipilersortoralugit.