Inuit 16-it – ataatsimoorneq

Niaqornaarsuup Ilua, 2024.

Paneeraq umiatsiami nikuilluni avannaani Niaqornaarsuup Iluani qaqqat isigai. Anoraasuannguup silaannarik pinngortitallu tikka nassataraa, tarninganillu nukittortitsilluni. Piffissami sivisuummi aavaqataasarsimanani aatsaat manna aavaqataavoq. Nuia Pavia taanna aappariillu meeraat marluk peqatiginagit piniariartarsimagaluarpoq. Aavarnerup qanoq timimut tarnimullu tunisisartigineranik misigissuseq pikkugivippaa. Illoqarfik nipilioqisoq qimallugu, tuttut, umimmaat eqaluillu avatangiiseralugit. Tassa aatsaat. Paneeraq silaannarimmik najuussuivoq. Minutsialuit qaangiuppata tuttumik pernarnissani naluaa. Ullut ilaanni tupermit ungasissumut pisunnatik sineriak sinerlugu piginiassanik ujarlertarput. Ullumilu ullut tamakku ilagaat.

Tassanngaannarli tuttu qaqqanit sivingasuni takoriasaarpaat. Paneeraq seqqortaalermat tuttu tupappoq, tungaannullu aallarluni. Ernera nuannaarnermik pississaartuinnaalluni oqarpoq: Anaana! Pernarputit!

Paneerarlu pissanganermut aallaamanermullu sajuttuinnanngoqqavoq, erninilu qungujullugu.

Nammineq piniaqataalu nunamut pissillutik tuttu malilerpaat. Paneeraq seqqoqqippoq. Uniorluguli.

Tuttu imaanut avalappoq, Paneerarlu angalaqatinilu angallammut ikeqqipput. Aamma tassa. Hajja.

Angallammiilluni ummilerpoq, tuttulu qungasiatigut aallaallugu. Paneeraq tuttumik pernarpoq. Angusaq imaannaanngitsoq!

Tamanna nammineq kisimi ajugaanerinngilaa, tamarmik ajugaaneraat. Neqaami qanoq pissanerlugu nalunngilluinnarpaa. Ilaqutariimmi aavarlutik aallannginnerminni, tuttu Uummannami utoqqaat illuanni najugaqartunut utoqqarnut tunniunniarlugu aalajangereersimavoq.

Namminermi uinilu taamaaliukkajupput – utoqqaat tuttunik, puisinik, qilalukkanik qaleralinnillu pajuttarpaat.

Paneeraq Zeeb 33-nik ukioqarpoq Pavia Zeebilu uigaa. Meeqqatillu Nellie Hans-Peterlu qulingiluanik aqqaneq marlunnillu ukiullit peqatigalugit Uummannami najugaqarput.

- Uiga kisimi aavariartaraluarpoq. Siornali aavaqataarusunnginnersugut aperaatigut, pilerineruliinnarpugulli. Nuann! Taama immikkuullaritsigalunilu pikkunartiginera ilisimasimanngilara, Paneeraq Zeeb, sapaatip akunnialuit matuma siorna Niaqornaarsuup Iluanut aavarsinnarluni utertoq oqarpoq. Tamaani tuttumik pernarpoq.

Ataqatigiinneq akillu

Ukioq mannalumi aavarneq aggustip 13-ianit 19-ianut pisoq pakatsinanngilaq.

- 16-iulluta umiatsianut tallimanut tupernullu sisamanut agguarsimalluta aavarpugut, nerisassiornermilu, piniarnermi, imertarnermi meeqqanillu paarsinermi ikioqatigiittarpugut, Paneeraq Zeeb oqaluttuarpoq.

- Uigalu sinerissap avataani umiatsiami ukiunik qulinik angusilluta katiffissiorpugut, taanna oqarpoq. Aavarneq, piniarneq nammineq nerisassiorneq ilaqutariit pingaartitarilersimavaat.

- Inuunerput allanngorpoq. Kalaaliminernik pilisarneq naleqartitannguuppoq maannalu nammineq pisatsinnik nererusunnerulerpugut, Paneeraq Zeeb oqaluttuarpoq.

Ileqqulli tamatumani kisimik peqqutaanngillat, pisiassat akiisa annertuumik qaffannerat pissutaalluni aavartarneq pisariaqartunngorpoq.

- Ingammik avannaani akit qaffasissorujussuupput. Assersuutigalugu nersussuup neqaa aserortigaq minneq 80 koruunit angullugit akeqarsinnaasarpoq. Taanna pisiarinagu nammineq tuttup neqaanik aserortikkamik sanarusunneruvunga. Aammami peqqinnarnerujussuuvoq, taanna oqarpoq.

Ilaqutariit neqinik aserorterisarput, tuttumik uullillutik, suppaliorlutik kiisalu inuuissiortoqarnissaanut juullimullu nalliuttorsiornissamut toqqorsisarlutik.

- Ukioq manna siullermeerluta tuttunik nikkulineq misilissavarput, Paneeraq Zeeb oqaluttuarpoq.

Paneeraq kisimi uerinngilaq, meeraalumi marluk aamma piniaqataanermik tiguartivipput.

- Misigisat nutaat qanoq meeqqatsinnut sunniuteqarnersut takuara, namminneerlutik nuniagiarsinnaanermut, kuummi eqalunniarsinnaanermut kiffaanngissuseqarput. Nuannaartupilussuupput, tamatigullu ungasiliarluni pisunnissamut tullermut qilanaartarlutik, Paneeraq Zeeb, ilaqutariittut nunatsinni pinngortitap pisuussutaanik iluaquteqarnerup qanoq pingaaruteqartigineranik takunnissinnaasoq oqarpoq.

Siullermeerlutik aavartut

Siorna aappariit meeraat tuttumik pernarput.

- Meeqqat pinngortitamiikkaangata misigissusaat takujuminartorujussuusarpoq. Meeqqakka tuttumik pernarmata qanoq tanngassimaartiginerat takusinnaavara, anginerusutummi nukittunerusutullu misigipput. Ukioq manna ernera marlunnik tuttuppoq, tulluusimaaqaarlu, Paneeraq Zeeb oqaluttuarpoq.

Ukioq mannalu uiata soraluaa qulingiluanik ukiulik tuttumik pernarpoq, ilaqutariillu nipituumik nipilersorlutik, qitillutik Faxe Kondi champagnialerlugu fiistapput.

- Uima qatanngutaata nulia aamma pernarpoq. Angalalluaqaagut, taanna oqarpoq. Maannalu ilaqutariit illoqarfigisaminnut utersimalerput. Pinngortitamit angerlarput, aavarnerullu inuit 16-t imminnut qaninnerulersippai. Piffimmit imminnut pinngitsoorsinnaanngiffimminnit, tassanilu nipaanneq suleqatigiinnerlu atorlugit ataatsimoornermi nukik pillersippaat – kiisalu aamma imminut napatissinnaanerup kiffaanngissusaa aamma. Pinngortitami qaqorteqqasut nersussuullu neqaata agguakkap akia pingaaruteqanngillat. Uumasut tumaannik takunnissinnaaneq, ilaqutariit nukingat ataatsimuussusiallu tamaani pingaaruteqarput.