INUNA Podcast: Danmarkimi kalaallinut katersuuffik nutaaq
Podcast nutaaq kalaallinut Danmarkimi najugaqartunut saaffiginnittuuvoq, taakkulu aamma isummaminnik, naleqqussorisaminnik, aammalu katersuutsitsisunik immersuinermt sunniuteqaqataasassapput.
INUNA-p saqqummiunneqaqqaarneranut inuit 100-nit amerlanerusut 28. februaarimi Holstebromi kaffisortitsinermut takkupput.
November 2022-mili paasinarsimmat, Nordisk Teaterlaboratorium, Holstebromiittoq kalaallisut oqaasilimmik podcastinik suliaqartalissasoq, suliniutinut aqutsisup Arnannguaq Gerstrømip suleqatigiittussat katersorsimavai aamma Danmarkimi kalaallinut najugaqartunut tusarnaagassatigut katersortarfissap sinaakkutissaasa pilersinnissaat qasusuilluni sulissutigisimavai.
Ukiuni tulliuttuni pingasuni INUNA PODCAST kalaallit Danmarkimi inuunerannit oqaluttuanut nalunaarutinullu, kinguaariit akornanni assigiinngiaassusermut aamma assigiinngitsunik piginnaassuseqarnermut qitiussaaq, tusagassiuutinut nalunaarummi taama ilisimatitsisoqarpoq.
Suliassaq angisuujusoq isiginnaartitsisarfiup pisortaata Per Kap Bech Jensenip aamma Arnannguaq Gerstrømip nalornissutiginngilaat, aamma INUNA-p ammasumik pissuseqarluni, maniguullluni aamma alapernaalluni kalaallit kinaassusaat oqaasiilu tapersersuiffigissavai, aamma ammasumik oqaloqatigiittoqarnissaanik sunniivigeqatigiittarnissamillu aalajangiussinikkut maani kalaallit najugaqartut akornanni atassuteqaatinik nutaanik pilersitsissalluni.
Ataaatsimoorfik
INUNA PODCAST-ip illuutitigut sinaakkutissai siunertaalu aamma inuit ornilluta tikilluaqquneqarnissaat eqqarsaatersuutigineqarsimaqaat. INUNA-p nipaa qullasissumi tusarnaagassiarineqartassaaq - Nordisk Teaterlaboratoriumimi napasuliami. Qangaasuuppat oqartoqassagaluarpoq radiop napasuliaani. Napasuliaq immiussinerit, qiortaanerit internettillu akornani ataqatigiissutaassaaq, tassanngalu INUNA aallakaatinneqartassalluni.
- INUNA-mi siunertaraarput kalaaleqatigut allat Danmarkimi najugallit peqatigalugit podcasti pilersissallugu ineriartortissallugulu. Suna tamarmi qanoq issasoq oqarnavianngilagut. Ataatsimoorfiussaaq, nipinut assigiinngitsorpassuarnut inissalik, suliniutinut aqutsisoq Arnannguaq Gerstrøm oqaluttuarpoq.
Saqqummiussinermut peqatigitillugu aamma oqaluttuarisaanermi kingumut qiviarneruvoq, Danmarkimi Kalaallit Illuat siulleq Holstebromi Danmarksgademiissimammat.
Podcastip saqqummiunneqarnerani erinarsoqatigiit Kilitaq Skivemeersut erinarsorput, ilaatigut borgmesteri HC Østerby aamma isiginnaartitsisarfiup pisortaa Per Kap Bech Jensen aamma oqalugiarput. Suliniummik aqutsisoq Arnannguaq Gerstrøm podcastip ilisarnaatitut nipilersuutitaata erinaa, nammineq erinniani, isertunut Kai Bredholt, Nordisk Teaterlaboratorium-imeersoq nutsugiartoralugu, qarlortarluni tusarnaartitsissutigivaa.