Inuulluaritsi, qujanarlu

“Arfineq-pingasuinnarnik ukioqarlunga ataatap ilinniartippaanga qanoq sanassagiga.

Qanoq pujortassagiga. Kanngusuttarpunga taamak perorsagaagama. Kisiat allanngortissinnaanngilara.

Ilissi meeqqasi puiguinnarnagit, Ilissi meeqqassi allatulli paarisigit.”

Prussicikkut atugaasa ilaat “Angajoqqaat” taama taallaqarpoq.

Eqqaamavara, ukiut 22-it matuma siorna, CD “Misiliineq Siulleq” saqqummermat. INGASAK. Meeqqanik sumiginnaaneq, aalakoorneq ikiaroornerlu pillugit taama unneqqaritsigisumik ammatigisumillu kalaallisut rapperneqarneranik siornatigut tusarsimanngisaannarpunga. Maasip, Taatsip Kunullu kisimiittutut misigisoqannginniassammat meeqqat sumiginnakkat sinnerlugit rapperput.

- Taamanikkut CD saqqummermat eqqaamaqqissaarpara, taamanikkut Qapiarfiusaami najugaqarpunga, kikkullu tamarmik pigaatInuit taama sakkortutigisunik erseqqitsigisumillu oqariartuuteqarnissamut saperatik saqqummertut torragersuaarpakka, Tuperna Lynge Kristiansen oqarpoq

Taanna Sisimiuni najugaqarpoq, tusarnaariarniarlunilu Nuummukarsimavoq.

Kulturikkut illorsuup Katuap nipilersoqatigiit tusarnaartitsinissaat sapaatip-akunneri pingasut sioqqullugit nalunaarutigaat, akunnerillu arfineq-pingasut ingerlaneranni tusarnaartitsinissamut isissutissat tamarmik nungussimapput. Nukappissat taamaalillutik aqaguani tusarnaartitseqqipput. Ullup aappassaani aamma isissutissat nungupput. Tamatuma Prussicikkut saqqummerneranniit ukiut 22-it qaangiukkaluartut nunatsinni sapaatip-akunnerata naanerani aliikkusersuisussani nuannernerpaasut takutiinnarpaa.

Tusarnaartitsinissamut akunnialuinnanngortut.

Maasi eqqissiviippoq. Prussic ukiut aqqanillit matuma siorna kingullermik tusarnaatitsipput, maannalu naggammik tusarnaartitsilerput. Itisuumik anersaartorneq pissangallunilu misigineq.

Nuliani Nahome, aamma appeqataasussaq, meeqqatillu isigai, ingerlaannarlu nakussappoq. Qujanarmi najorai, eqqarsarpoq.

- Pissangaqaanga, nuannerpallaanngitsumik, Maasi Pedersen, meeqqanut, inuusuttunut ilaqutariinnullu naalakkersuisussatut suaarutigineqaqqammersoq, oqaluttuarpoq.

Maasi, Kunuk Taatsilu unnukkorsioqatigiipput, pissanganerujussuannullu iluaqutaalaarpoq. Kunup, Danmarkimi najugaqartup, Nuummut tikinnera Maasip qujamasuutigeqaa. Maanna tamakkerput. Maasittaaq ataatsimoornertik oqiliallaatigaa. Scenemut qaqilluni tusarnaariartunut oqariartuutinik saqqummiusseqqinnissat tassunga sakkortujuaannarpoq.

- Rapperutigisartakkakka uannut namminerlu misigisannut tunngapput. Meeqqat inuusuttullu allat sinnerlugit oqariartuuteqartarpugut, oqarpoq.

- Sassarluni oqariartuutit uteqqillugit sakkortusarnermut, aamma inoqartuaannarami tigusisussanik, Maasi Pedersen oqaluttuarpoq.

Tusarnaartoqanngippat Prussiceqarnavianngilaq

- Malinnaasunut qujarusukkatta tusarnaartitsivugut. Qamannga pisumik qutsavigerusuppagut, Maasi Pedersen oqarpoq.

Tusarnaartitsinissamut minutsit quliinnanngorput.

Katuap paarlersua inunnik ulikkaavippoq. Inuit seqinersiutillit, nerutuunik atisallit baajamillu tigummisut pisussat qaqutigoortoq misigissallugu piareersimalluinnarput. Qulliit qaammarmata tusarnaariat nilliapput. Teknikeri scenemut qaqimmat tusarnaariat nilliapput.

- PRUSSIC! PRUSSIC!, utaqqisinnaanatik nilliapput.

Inuit eqqissiveqanngillat.

Nukappissat kiisami scenep tunuaniit nuipput. Majuartarfimininnguit qaqillugit inuit nuannattorsuit nuivaat, tusarnaariat taallanik uummammik eqquingaaramik annernartunik tusaasussat.

Inuit nilliapput.

- Qaqigatta pissangaqaagut, silaqanngiusappugulluunniit, Maasi Pedersen tusarnaartitsinerup kingorna oqaluttuarpoq.

Tupigusungaarama tallora nakkarpoq.

Inuit nipitunerusumik nilliapput.

DJ’ip nipilersuut aallartinniariaraa tusarnaartut erinaq sorleq appinneqarnersoq paasivaat. Tusanaartitsineq aallartiinnaqaaq. Aqagussaqanngitsutut.

Tuperna tusarnaariat akornanniippoq. Qullilivoq. Misigissuseqarsuaarpoq. Avatangiiseeruttutut misigivoq. Nipilersuut kisiat tusaavaa.

- Pilluaammerujussuarlungalu qujamasussuaarpunga. Meeraaninnut utersaarlungalu pisoq puigunngisaannartussatut eqqarsaatigaara, Tuperna Lynge Kristiansen oqaluttuarpoq.

Perorsalaarsinga!

Inuit unnuk naallugu nuannapput, mobiliminnillu filmiliortoqaannaavippoq. Inuit pisoq takussusiorumavaat, arlallillu FaceTimekkut malinnaapput. Tusarnaariat erinnani tamani rappeqataapput.

- Inuit aliannaarlutik tusarnaartitsineq tamaat rappeqatigaatigut. Soorlu tassa erinnat uagutsinniit nalunnginnerugaat, taamaammat kukkunissatsinnut periarfissaqanngilagut, Maasi Pedersen illarluni oqaluttuarpoq.

Kalaallit Nunaat nunarsuarmi imminortoqarnerpaasoq imminorsimasunilu inuusunnerpaaq qulingiluanik ukioqartoq unnuup ingerlanerani iikkamut seqertitatigut takuneqarsinnaavoq.

Nukappissat “Qaa, perorsalaarsinga” rappermassuk soriarsinnaannginneq, eqqissiviinneq kamannerlu misigigakkit sakkortungaarmata imminut naammagiunnaartutut misigaanga. Prussicikkut inuiaqatigiinnik uparuaallutik nipilersuutitik atorlugit isumaginninnikkut ajornartorsiutit oqaasinngortikkaat ersarippoq.

Tusarnaartitsinerup aallartinneraniilli nuannaterujussuartoqaannaavippoq, erinarlu “Fiiist” appikkaluaannaq unitsinneqarpoq.

Maasip DJ kukkusoralugu qinngarerpasillugu qiviarpaa. Naaggali. Tupaallatsinneqalerput. Rappertartut CD-nik 12.000-inik tunisaqarsimagamik tupaallatsinneqarlutik platininnatsinneqarput.

- Naluuipparput, tamattalu tupaallatsitaaqaagut, Maasi Pedersen oqarpoq.

Inuit appisimaartut sinnerlugit nuannaaqalutik nilliapput tusarnaartuullunilu taama nersorinninnermut ilaalluni arlaatigut tulluusimaarnarpoq. Inissaminiilluinnarpoq.

Isaarissap tungaanut tunuarterpunga. Inoqarpallaarpoq, timeralu tamakkerlugu nippoqqutattutut misigivunga. Qujanartumik iikkamut seqertitaqarmat taamaalilluni inuppassuarnut akuliutinngikkaluarluni tunuaniit malinnaasoqarsinnaavoq.

Tassani tusarnaartitsinerup sinnera tusarnaarpara atugaallu tamarmik naagaangata oqariartuutaat puigortussaajunnaarlugit misigisarpunga. Akunneq ataaseq affarlu appisimaareertut erinaq kingulleq rapperneqarpoq. Prussiciccullu taamaalillutik oqaluttuaannanngorput.