Isikkamik arsartartoq Arnaq

Arnaq Bourup Egede inuk nipaatsoorpasippoq. Angusaminik nipituuliutiginnittuunngitsoq. Kalaallit isikkamik arsartartuni ilisimaneqarluarpoq, tassami nunatsinni arnat isikkamik arsartarnerat oqaluuseritillugu atia taanngitsoorneqarsinnaanngingajappoq.

AG-p Arnaq Bourup Egede ullumikkut Avannaani Ilulissani najugaqartoq naapippaa. Ilulissani pisiniarfik Malibu, BL, atisanik meqqinik Bolt Lamarinik nuannarineqarluartunik pisiniarfiit ilagaat, taanna Arne Mogensenimit aamma Mala Johnsenimit ingerlanneqarpoq.

Ilulissani pisiniarfimmik ingerlatsisunngornissaq Arnaq Bourup Egedep pilersaarutiginngilluinnarsimavaa. Ilinniartitsisutut ilinniarsimavoq, ilaqutaalu amerlasuut aamma taamatut ilinniagaqarput.

Kisianni ukioq 1991-ip qaammataasa qulingiluaanni aallarteriarta. Arnaq Bourup Egede tassani inunngorpoq.

- Sisimiuni septembarip 23-anni inunngorpunga, tassanilu meeqqat atuarfianni aallartittussanngornerma tungaanut najugaqarpugut, pingasunngornermi ullaakkut issittumi pisiniarfimmik ammaannginnerani, Arnaq Bourup Egede AG-p pissarsiarimmagu taama oqaluttuarpoq.

Taassuma arnaa tassaavoq Ellen Bang Bourup, Arnap oqarnera naapertorlugu ilinniartuujuartuuvoq.

-Ilinniartitsisutut ilinniarnikuuvoq, masteritut aamma tarnikkut katsorsaasartoq ilinniarsimavoq, Arnaq Bourup Egede oqarpoq.

Angutaa Otto Egede aalisartuusimavoq. Ukiut marluk matuma siorna toquvoq.

Arnaq Bourup Egede qatanngutigiinnit arfinilinneersuuvoq,

- Kisianni anaanannit ataatanniillu ataasiinnarmik qatannguteqarpunga, aniga Múte, taanna peroriartoqatigaara. Ataatannit allarpassuarnik qatannguteqarpunga: Aniga Napaartoq, angajora Upaluk, aniga Masaana aamma aqqaluara Jens-Nuka, taanna oqaluttuarpoq.

Arnaq Bourup Egede tallimanik ukioqartoq ilaqutariit Narsamut nuupput. Eqqaamasai siulliit tassanngaanneerput.

- Aananni illooqqakkalu ataatsimoortarnerput eqqaamanerpaavara, taanna oqaluttuarpoq.

Narsami meeraanermini ilaatigut nipilersorneq isiginnaartitsisarnerlu sammisarpai.

- Pattagiartarpunga katersortarfimmilu assigiinngitsunik isiginnaartitsisarluta. Taamanikkut Narsaq uummaarittorujussuuvoq, tamannalu nuannareqaara, taama eqqaamasaqarpoq.

Arnaq Bourup Egede siusissukkut arsartalerpoq.

- Aniga meeqqallu allat illoqarfimmeersut arsaqatigiuaannarnikuuakka, taanna oqaluttuarpoq.

Narsaq Arnaq Bourup Egedemut nuannersumik toqqissisimanartumillu eqqaamasaqarfiorpasippoq, pingaartumik aamma sunngiffimminni atsamini aamma akkamini savaatilinniittarsimagamik.

Allanngorfik

Arnaq Bourup Egedep angajoqqaavi avimmata, anaanani aninilu Nuummut nuupput. Arnamut qulinik ukiulimmut allanngorneq annertooq. Piffissaq artornarpoq, illoqarfimmullu anginerusumut aamma atuaqatit amerlanerusunut sungiussiniarnera sivisuvoq. Aanamini ataatsimoortarneq aamma savaateqarfimmiittarnertik maqaasivai.

- Kisianni sungiussivunga Nuummiunngorlungalu, taanna oqarpoq.

Naak Arnaq Bourup Egedep Nuummut nuukkamik isikkamik arsartarnini unitsikkaluarlugu, 14-inik ukioqarluni arsartaleqqippoq.

- Atuaqatikka GSS-imi isikkamik arsartalernerat pissutaavoq. Ilaarusunnersunga aperaannga. Siullermik ilaajumanngikkaluarpunga, imaluunniit saperaluarpara, tassami ittuutoorujussuugama. Inuusuttut klubbertarfiannulluunniit isersinnaanngilanga, taama ittoortigaanga, taama eqqaamasaqarpoq.

Kisianni novembarip tallimaanni 2005-imi – ukiut 19-it matuma siorna – pisoqarpoq.

- Niviarsiaraq inuuissiorpoq, inuuimminilu ullormi tassani susoqassanersoq aalajangiisussaavoq. Arsariassasugut oqarpoq, tassa Najaaraq sunaaffa ikinngutigillualigassara, Arnaq Bourup Egede oqaluttuarpoq.

Taava ikinngutigiit ataatsimoortutut malinnaapput. Tassani ikinngutiginerpaasami aappaa Laila naapippaa. Ikinngutigiit pingasut taakku ullumikkut suli qanimut attaveqarput.

Meeqqat atuarfiata naammassinerata kingorna Portugalimut AFS-eriarluni aallarpoq. Europap kujataata kitaanut aallassalluni sooq aalajangersimaneranut apeqqummut akissutaa ersarippoq: Cristiano Ronaldo. Isikkamik arsartartoq nuannaartorilluinnagaa.

Portugalimi angajoqqaarsiani misigisaqarluarfigisimavai, ullumikkullu suli attaveqarfigalugit. Inersimasunngoreernermi kingorna pingasoriarluni tikeraarsimavai.

Arnaq Bourup Egedemut inuit, kulturi aamma arsartartoqatit nutaat pitsaasumik ineriartorfiusumillu angalaffiusimavoq.

- Portugalimut angalaneq nunatsinni qanoq atugarissaartiginitsinnut tunngatillugu uisitsisimavoq, taanna oqarpoq.

Portugalimi ilinniarnertuunngorniarfimmini illoqarfinnit allanit ilinniarnertuunngorniartunut unammisarsimapput.

- Isikkamik arsarneq inuuninnut annertuumik ilaajuaannarsimavoq. Ikinngutit aamma ataatsimoorneq nuannaraakka. Isikkamik arsaraangama suna tamarmi apeqqutaajunnaartarpoq, uannut naqisimaneqanngitsutut misigiffiuvoq. Ulluinnarnit nikilaarfiusoq aamma eqqissisimaarfigisinnaasara, Arnaq Bourup Egede oqaluttuarpoq.

Silami aalajuartuuvoq, snowboardertarluni aama pinngortitamiinneq nuannariuaannarsimavaa.

Nunanut allanut unammisartuuneq aamma GU

Arnaq Bourup Egede arnat isikkamik arsartartut nunanut allanut unammisartuinut toqqagaasimalluni paasigamiuk suli Portugalimiippoq. Tamanna 2009-mi pivoq. Island Gamesimut peqataavoq.

- Inuusuttuaraavunga sulilu timikkut ineriartorlunga. Taamaallaat paarlattaasuunerusarpunga, arsaqataavallaartarnangalu, kisianni nuannisartorujussuuvunga, taama eqqaamasaqarpoq.

Portugalimeereerami Nuummi ilinniarnertuunngornialerpoq. Piffissaq nuannaffiusoq.

- Ikinngutikkalu illumik attartorpugut, nuannisartaqalutalu fiistertarpugut. Piffissaq taanna nuanneqaaq, qungujuppoq.

Arnaq Bourup Egede isikkamik arsarluni GM-inut kisissaanngitsunut, Arctic Winter Gamesimut, Island Gamesimut aamma nunanut allanut unamminernut peqataasarsimavoq. Unammiartarnerpassuit pissutigalugit aasaanerani angalanissat taamaatittarsimavai.

- Eqqaamavara nammineq piumassutsinnik 2018-imi peqataannginnera, Roskilde Festivalimut peqataarusukkama, taanna oqarpoq.

Ilinniarnertuunngorniarnerup kingorna meeqqat atuarfianni Nuummi “Nuussuup Atuarfiani” taartaasartutut sulivoq. Sutut ilinnialissanerlugu ilisimalluanngilaa.

- Eqqarsarpunga tarnip pissusiinik ilisimasalittut ilinniarniarlunga, Århusimullu karakterikka qaffassariarlugit aallassallunga. Kisianni qaammatit arlaqanngitsut qaangiuttut ilinniartitsisunngorniarlunga aalajangerpunga, Arnaq Bourup Egede oqarpoq.

Nuummi Ilinniarfissuarmi 2014-imi ilinnialerpoq. Ullumikkut ilinniartitsisutut ilinniarsimasuuvoq.

- Meeqqanik ikiuineq nuannaraara, attaveqarfigilluartuaannarnikuullugillu. Meeqqat nuannareqaakka, aamma meeqqat ineriartornerannut tunngatillugu peqataanissara isumalerujussuuvoq, Arnaq Bourup Egede oqaluttuarpoq.

Ilinniartitsisunngorami Nuummi meeqqat atuarfianni “Kangillinnguit Atuarfianni” atorfinippoq.

Kisianni ukioq manna aggustimi aappani Milan aappariillu ernerat Félix 2023-mi inunngortoq, Ilulissanut nuukkamik atuarfik qimattariaqalersimavaa.

Ernerat gastroschiseqarmat, inunnguutsiminik meeqqap inalugai aamma timaata pisatai allat naavata silataaniimmata, Arnaq Bourup Egede Rigshospitalimi ernisussanngorsimavoq. Piffissaq ilaqutariinnut ilungersunartoq, inunnguuseq taanna pillugu ilisimasat amerlanngimmata. Félix ullumikkut peqqillunilu ajunngilaq.

Ilulissani Malibu

Ilulissani sulerissanerluni nalornissutigisimavaa, Arnaq Bourup Egedeli Arne Mogensenimut attaveqarluartuarsimavoq, taanna Nuummi pisiniarfimmik Californiamik meqqinik Bolt Lamarinik nioqquteqartumik piginneqataasoq.

- Ilulissat pillugu Arne pilersaarutaanngitsumik oqaloqatigaara, tassanngaannarlu Ilulissani Bolt Lamarinik pisiniarfinnik ammaassalluta aalajangerpugut, taanna oqarpoq.

Taamaaliorpullu.

Pisiniarfimmik ingerlatsisunngornissaq inuunermi pilersaarutaanut imaluunniit takorluugaanut ilaasimanngilluinnarpoq, kisianni nuannareqaa.

Ilulissani pisiniarfik ullumikkut ingerlataa taaguuteqarpoq, Malibu, BL, taanna 4. oktobarimi ammarpoq.

- Suliffiga nuannaraara. Ukioqatigiiaat tamarmik meqqi soqutigigaat takusinnaavara. Atisat arnanit angutinillu atorneqarsinnaapput, inuillu tigulluartorujussuuaat, Arnaq Bourup Egede oqarpoq.

Pisiniarfimmi sulinngikkaangami imaluunniit ilaquttani ilaginngikkaangamigit, sunngiffimmini suli isikkamik arsartarpoq.