Islandimiut kalaallillu nipilersortartui taarseeqatigiittassapput

Islandip Nuummi General Konsulatia, Air Iceland kulturillu illorsua Katuaq isumaqatigiissummik ukiuni pingasuni atuuttussamik atsioqatigiipput, taannalu isumaqatigiissutit taamaattut Nunatsinni siullersaraat.

Bandswap

Siunertaavoq Air Icelandip Nuummut aammalu Reykjavikimut timmisartuussisarnerini nipilersortartut angalatittarnissaat illoqarfinnilu taakkunani marlunni tusarnaartitsillutik, taamatut illua'tungeriit paasissutissiipput. Tamanna pissutigalugu isumaqatigiissut taaguuteqarpoq Bandswap, isumaqartoq nipilersortartunik taarseeqatigiinneq.

Bandswapimik suliniummi anguniarneqarpoq Islandip Kalaallillu Nunaata akornanni takornariaqarnerup annertusarnissaa, nunallu taakkua marluk kulturikkut attaveqaqatigiinnerisa nukittorsarnissaa.

Illua''tungeriit pingasut aamma neriuutigaat nuannarinnittut allallu Reykjavikimut Nuummullu angalatitsinerit atorluartassagaat tusarnaartitsisunik tusarnaariarnermut, minnerunngitsumillu illoqarfinnik taakkuninnga marlunnik takornariatut nalinginnaalluinnartutut misigisaqartarlutik.

Qangatut rocki

Islandimiut nipilersortartut novembarimi Katuami tusarnaartitsisussat ateqarput Dúndurfréttir, taakkualu islandimiuupput 1995-imi pilersinneqarsimasut.

Nipilersortartut taakkua Pink Floydikkut, Led Zeppelinikkut, Deep Purplekut qangatullu rockertartut allat nipilersugaannik immikkut ilaarsillaqqissuupput, tusarnaartitsisarnerinilu amerlasuut inunnik ulikkaavittarsimapput.

Nanook

Kalaallit nipilersortartut novembarimi Reykjavikimi tusarnaartitsisussat tassaapput nuannarineqartut Nanook, nipilersoqatigiillu Christian aamma Frederik Elsnerimit aallartinneqarsimapput, CD-nillu arlalinnik erinnanik taallanillu namminneq sanaaminnik saqqummersitsinikuullutik.

Nipilersortartut nunarsuarmi sumiiffinni arlalinni tusarnaartitsillutik angalasarsimapput, ilaatigut Canadami Japanimilu, Nunatsinnilu tusarnaartitsisarneri inunnik ulikkaavittarput.

Suliniut Bandswap Nuummi Islandip General Konsulatianit, Air Icelandimit kulturillu illorsuanit Katuamit suleqatigiilluni ineriartortinneqarsimavoq.