Israelimi angalanerup kingorna isornartorsiorneqarneq: Inoqatinut attaveqaatini tusaamasaq imminut illersorpoq
Israelimi ataatsimeersuarnermut peqataaneq Qupanuk Olsenimut malitseqarpoq. Israelip Hamasimut sorsunneranik tapersersuisutut pasillerneqarsimavoq, tamannalu ilumuunnginnerarpaa.
- Iliuuserisimanngisannik pasillerneqarama aliasuutigingaarpara. Ataatsimeersuarnermut peqataaninnut aningaasanik pissarsinngilanga. Israelimik tapersersuillunga oqarnikuunngilanga, sorsunnerillu suulluunniit akerleraakka, Qupanuk Olsen oqarpoq.
Toqqorsivimmit assilisaq: Leiff Josefsen
Kalaallit Nunaanni inoqatinut attaveqaatini tusaamasaanerpaaq Qupanuk Olsen inoqatinut attaveqaatini 1,4 millioninit malinnaaffigineqarpoq, tassanilu Q’s Greenland-imik taaguuteqarluni Kalaallit Nunaat pillugu oqaluttuartarpoq.
Israelimi Tel Avivimit angerlaqqammerpoq, tassanilu ataatsimeersuarnermi nunanit tamalaanit peqataaffigineqartumi inoqatinut attaveqaatini imassanik pilersitsisartunut oqalugiarpoq.
Ataatsimeersuarnermut peqataanera inoqatinut attaveqaatini isornartorsiorneqangaarpoq, Israelip Hamasimut sorsunneranik angalanera tapersersuinerusoq isumaqartoqarmat. Sorsunnermi tassani inuppassuit toqutaapput.
Sakkortuumik pasillerneqarneq
Qupanuk Olsen sorsunnermik tapersersuinngilluinnarpoq:
- Ataatsimeersuarnerup nalaani aamma Nuummut apuutinngitsungaluunniit sorsunnermik tapersersuisutut, oqaluttuarisaanermik ilisimasaqanngitsutut, imminuinnaq sullittutut, allat atugarliornerannit aningaasarsiorniartutut, meeqqat toqunerannik soqutiginninngitsutut allanillu sualuttumik pasillerneqarpunga, Sermitsiamut allappoq.
Sakkortuumik pasillerneqarnini pissutigalugu Kalaallit Nunaanni suliffeqarfinnut isumaqatigiissutinik annaasaqalerluni apersorneqarnermini itisiliivoq, tamannalu isumassaqartinnginnerarpaa:
- Iliuuserisimanngisannik pasillerneqarama aliasuutigingaarpara. Ataatsimeersuarnermut peqataaninnut aningaasanik pissarsinngilanga. Israelimik tapersersuillunga oqarnikuunngilanga, sorsunnerillu suulluunniit akerleraakka.
Aningaasarsiorsimanngitsoq
- Qaaqquneqarama aamma Nuseir Yassin, Nas Daily, Palæstinap Israelillu akornanni eqqissinermik pilersitsiniaasarmat, Nas Summit-imut peqataaniarlunga aallarpunga. Nuseir Yassin nammineq Palæstinamiunik angajoqqaaqarpoq musliimiullunilu. Palæstinamiunik Israelimiunillu suleqateqarpoq, taakkulu musliimiupput juutiullutillu, Qupanuk Olsen Sermitsiamut oqarpoq.
Timmisartumut bilitsit akunnittarfimmullu inissat Nas Dailymit akilerneqarsimasut, tassa Israelimi naalagaaffimmit akilerneqarsimanngitsut, oqaluttuarpoq. Oqalugiarnerminut akissarsisinneqarnani nerisassat aamma timmisartoqarfiit akunnittarfiillu akornanni angallannermi aningaasartuutit nammineq akilerpai. Ataatsimeersuarnermi aningaasanik Gazamut tunissuteqartoqarsimasoq aamma eqqaavaa.
Politikkikkut oqallinnissamut pilersitaanngitsoq
Qupanuk Olsen qanoq ililluni 1,4 millioninik malinnittoqalersimanerminik nunarsuarmilu tamarmi Kalaallit Nunaannik soqutiginnilersitsisimanerminik oqaluttuariartortinneqarluni qaaqquneqarpoq.
- Kalaallit Nunaata nunarsuarmi tusaamasaanerulerneranut peqataasimanera 1,4 millioninillu malinnittoqalersimanera qanoq tulluusimaarutiginerlugu, allallu nunaminnik nittarsaassiniarlutik qanoq iliorsinnaanersut oqaluttuaraakka.
Israelimiorpassuit sorsunnermut akerliunerata erseqqissaatiginissaa pingaaruteqartippaa, periarfissaqarsimasuugunilu Gazamut aamma tikeraarsimassagaluarnerarpoq.
Q’s Greenland politikkikkut oqallinnissaq siunertaralugu pilersinneqarani Kalaallit Nunaalli pillugu ilisimasanik pitsaasumik isiginnittaaseqarnermik silarsuup sinneranut avitseqatiginninnissamut pilersinneqarsimasoq, Qupanuk Olsen oqarpoq.
