- Nunatta nunassiffigineqaqqaarnerata oqaluttuarisaaneranut atatillugu soqutiginarlunilu immikkorluinnaq ittuuvoq.
Nunatta Katersugaasiviani Allagaateqarfianilu inspektørip Hans Langep sapaatip akunnerisa marlussuit matuma siornagut Avanersuarmi misissuinerminit paasisami oqaluttuarinissaat nuannaarutigigamiuk isertuutinngilaa.
- Nunatta nunassiffigineqaqqaarnerata oqaluttuarisaaneranut atatillugu soqutiginarlunilu immikkorluinnaq ittuuvoq.
Nunatta Katersugaasiviani Allagaateqarfianilu inspektørip Hans Langep sapaatip akunnerisa marlussuit matuma siornagut Avanersuarmi misissuinerminit paasisami oqaluttuarinissaat nuannaarutigigamiuk isertuutinngilaa.
- Misissuinitsinni paasisavut nutaat oqaluttuarerusuppakka, oqarpoq.
Hans Langep Pituffiup kitaani qeqertaaqqami Kitsissumi 110 kilometerit missaanik kippasinnerusumiittumi timmisartuaraq ungasianit aquttagaq nutaaq atorlugu illut takisuut sisamat tallimalluunniit assilillugit uppernarsarpai. Qeqertami pineqartumi qujanartumik arferit saarnginik nassaassaqarluarnera paasissutissiilluarpoq.
Hans Lange nassuiaavoq Thulekulturimeersut 1300-kkut missaanni Canadamit Nunatsinnut nunasisut arfernik piniartuusut, taakkualu arferit saarngi illuliornerminni atortarsimagaat. Illuni takisuuni ataasiakkaani ilaqutariit arlallit najugaqarsimanissaat ilimatsaanneqarpoq.
Ilaqutariit taakku kinguaariinni marlunni pingasuniluunniit Kitsissumi najugaqarsimagunarput, tamatumalu kingorna qeqertaq qimallugu allamut nuussimagunarlutik.
- Tupaallannarpoq soqutiginarlunilu. Taama kulturillit qeqertami najugaqarsimanerannut tamanik uppernarsaatissaqarpoq. Inuiannik arfanniarnermik inuussutissarsiuteqartunik, Hans Lange oqarpoq.
Katersugaasivimmi inspektøri oqaluttuarpoq, Thulekulturimeersut Nunatsinnut pimmata Dorsetkulturimeersut nunami maani najugaqareersimasut. Dorsetkulturimeersut 1300-kkut missaanni tammarsimapput, Thulekulturimeersullu Qaanaap Pituffiullu eqqaanni nunanik taakku atorsimasaannik atuisimallutik.
Piffissap ilaani arferit ikiliartorsimapput, Thulekulturimeersullu inuussutissarsiutinik allanik toqqaasariaqarsimallutik, Hans Lange nassuiaavoq.
Arfanniartuunerminnut taarsiullugu puisinniarnermut nuussimapput. Illuliortaasiallu allanngorsimalluni illuni takisuuni ilaqutariit arlallit najugaqartarnerannut taarsiullugu ilaqutariinnut ataasiakkaanut naatsorsuussanik illuliortalersimallutik.
Arferit saarngisa saniatigut Kitsissuni qaanniveqarsimaneranut aamma uppernarsaatissaqarpoq, taamalu paasinarsilluni Thulekulturimeersut umiamik aamma angallateqarsimasut, Hans Lange oqarpoq.
Taassuma ilisimatitsissutigaa, maannamut ”taamaallaat” assilisanik uppernarsaatissaqarmat, tassa timmisartuaqqanik ungasianit aquttakkanik assilisaminik. Tulliullugu suliassaassalluni nassaarineqartunik pisoqaassusiliinissaq. Tamatumani pisariaqartinneqartoq tassaalluni tamaani najugaqarsimasut atortorisimasaannik nassaarnissaq. Soorlu unaamik.
