Jens N. kalaaliunermik uppernarsaasoqarsinnaannginnera pillugu: Akuersaarneqarsinnaanngilaq aamma kanngunarpoq

Arnaq kalaaleq inuusuttoq Canadami ilinniartoq ilungersunartumi inissisimatinneqarpoq. Taannami kalaaliunini (Inuk) uppernarsarsinnaanngilaa, naak kommunimut Namminersorlutillu Oqartussanut saaffiginnissuteqarnikuugaluarluni. Tamanna Naleqqamiit akuersaarneqarsinnaanngilaq.

- Uanga taanna akuerisinnaanngilara. Ajorpoq, uagut Kalaallit Nunaanniit taassuma kinaassusaanik uppernarsaasinnaanngilagut. Taamaammat siunissami tamakkua pinaveersaartinneqassappata kinaassuseq inississallugu pingaaruteqartorujussuuvoq, Jens Napaattooq Sermitsiaq.AG-imut oqarpoq.

Naleraq kina kalaaliuneranik Inatsisartuni oqallinnissamut siunersuuteqareernermini inuiaqatigiit akornanni oqallinnermik aallartitsivoq. Oqallititsineq assigiinngitsunik isumaqarfigineqarpoq, ilaasa oqallinneq nikassaanertut isigigaat allallu kinaassutsimut apeqqut pingaaruteqartinngilaat.

Kinaassuseq qanoq pingaaruteqartiginera Nivi Rosingip nalaataanut assersuutaalluarsinnaasoq, Naleqqami politikkikkut oqaaseqartartoq isumaqarpoq.

- Nunatsinni amerlanerussuteqarpugut taamaammat kalaaliunerput uppernarsarneqarsinnaasariaqarpoq. Inuit allat soorlu Candami ikinnerussuteqarput, taakkualu arlalitsigut kinaassusertik uppernarsartariaqartarpaat, uagut aamma pappiliatigut uppernarsarsinnaasariaqaripput isumaqarpunga, Naleqqami politikkikkut oqaaseqartartoq naqissusiivoq.

Ammasumik oqallinneq nikanarsaanerunngilaq

Nivi Rosingip nalaataanut tunngatillugu suliaq inuttut pisinnaatitaaffiit pillugit eqqartuussivimmut ingerlateqqinneqartariaqaraluartoq, Naleraq isumaqarpoq. Taamaasiornikkummi nunap inoqqaavisa pisinnaatitaaffii malinneqarsinnaasammata.

- Inuit pisinnaatitaaffiit pillugit eqqartuusivimmut tunniunneqartariaqaraluarpoq. Ilumoorsinnaanngilaq Canadami ilinniartoq kalaaliunini uppernarsarsinnaanngikkaa, Jens Napaattooq erseqqissaavoq.

Kalaallit Nunaata kinaassuseq inuiaassuserlu pillugu ukiorpassuarni suliaqarnikuugaluarpoq, sulialli inernilerneqarnikuunngillat. Namminersorlutik Oqartussanut ataatsimiititaliarsuaq "oqartussani" kingulliulluni apeqqummut suliaqarpoq.

Kalaallit Nunaat nutaanerusoq politikkukkut siammasissumik erseqqissaalluni piareersaasariaqarpoq.

Apeqqut uaniippoq qanoq annertutigisumik piorsarsimassutsikkut - taassuma ataani oqaatsit - akuugaanerlu aporfilersuunatik inuit kinaassusaanut aarlerinartorsiortitsinatik suliaq naammassineqarsinnaava.

Allatut oqaatigalugu: Qanoq ammatigisumik nunap inoqqaavi nunarsuamioqatigiinnut inoqqaanerminnik ersertitsisinnaappat? Taama ilaatigut Namminersorlutik Oqartussat ataatsimiititaliarsuaat 2002-mi allappoq.

Jens Napaattoorlu kinaassusermut apeqqut pingaaruteqartoq naqissuserpaa

- Kanngunaqaaq kinaassusitsinnik inissiisinnaannginnatta. Kinaassuseq eqqartorneqaleraangat racistimut saatinneqapallattarnera uggornarpoq. 2009-mi namminersorneq eqqunneqarpoq taamanili suliakkiissutigineqarnikuuvoq, kiisa maannakkut 2022-inngorpoq suliarinaveersaarlugu, Jens Napaattooq oqarpoq.

Taassuma neriuutigaa arlaatigut nunatta Nivi Rosing ikiorsinnaasagaat, allallu aalajangigassat annertuut oqallinnikkut anguneqariartuaarumaartut neriuutigalugu.