pilluaritsi
Juaaka Atuakkiortut Peqatigiiffianni siulittaasunngortoq
Atuakkortut Peqatigiiffianni ukiorpassuarni siulittaasuusimasoq, Hans Anton Lynge, siulittaasuujunnaarpoq. Juaaka Lyberth siulittaasutut ivertinneqarpoq
Kalaallit Atuakkiortut peqatigiiffiata (KA-p) pisarnertut ataatsimeersuarnerani Nuummi septembarip aqqarnganni ingerlanneqarpoq. Tassani siulersuisussanik nutaanik qinersisoqarpoq.
Ukiorpassuarni siulittaasuusimasoq Hans Anton Lynge, siulersuisuni ukiuni 36-ni sulereerluni tunuarmat, unammillerteqarani siulittaasumut qinerneqarpoq Juaaka Lyberth.
Peqatigiiffik tusagassiutinut nalunaaruteqarpoq.
KA-mi ilaasortaasinnaanermut piumasaqaatit nutaamik aaqqissuussiffigineqarnissaannut oqallinnermi, ataatsimeersuartunit isumaqatigiissutigineqarpoq siulersuisuisunngortut sulissutigissagaat ilaasortat amerliartorteqqinniarnissaat. Atuakkanik ilusilersuisartut, assitalersuisartut assigisaasalu ilaasortaasalersinnaanerat siulersuisortaanit misissorneqassaaq, ilanngullugulu kalaallit qallunaatuinnaq oqaluttut atuakkiortulluunniit allat kalaallisut oqalussinnaanngitsut nunatsinnili najugaqartut ilaasortaasinnaanerat qanoq aaqqissuussiffigineqarsinnaanersoq misissorneqassalluni.
KA-mi siulersuisunngortut:
- Siulittaasoq: Juaaka Lyberth
- Allatsi:Tupaarnaq Rosing Olsen,
- Aningaaserisoq: Sørine Steenholdt
- Siulersuisunullu ilaasortat: Juana Petrussen aamma Kirstine Kreutzmann
- Sinniisussatut inissipput: Hjalmar Dahl aamma Markus E. Olsen