Julie Berthelsen Sverigemut nutserpoq
Uini Minik Dahl Høegh ornillugu nuulerpoq
![Julie Berthelsen Sverigemut nutserpoq](https://image.sermitsiaq.ag/341793.webp?imageId=341793&width=960&height=640&format=jpg)
Erinarsortartoq Julie Berthelsen meeqqanilu marluk Danmarkimit nuulerput.
Julie Berthelsen meeqqanilu Sverigemut nutserput, uia assammik arsaattartoq Minik Dahl Høegh, tassani timersoqatigiiffimmi Amo Handbollimi 2023-p tungaanut isumaqatigiissuteqarpoq.
Aappariit aggustip aallaqqaataanili immikkut nunaqarsimallutik, erinarsortartoq Facebookimi allappoq, tamannalu maanna allanngortinniarpaat.
- Soorunami maani dk-mi ukioq manna sulisaqattaassaanga. Taamaammat uanga maanna aallaqqasaqattaartussanngorpunga. Kisianni anigorumaarparput. Erniinnaq nuuttussanngornerput nutaamillu misilitaqarnissarput pingaarnerpaavoq, Julie Berthelsen allappoq, uani ataani takuneqarsinnaavoq.
Ilaqutariit illoqarfeeqqami 900-t missaanni inulimmi, Københavnimit akunnerit sisamaat avillugu sivisussusilimik biilerluni ungasissusilimmi najugaqassapputik, Julie Berthelsenip Billed-Bladetimut oqaluttuaraa.