Julie meeqqat ornittagaannut aningaasanik qulakkeerisuussaaq
Julie Berthelsen, Kimmernaq aamma Søs Fenger kulturikkut illorsuarmi Katuami arfininngorneq 25. oktobari tusarnaartitsissapput
Aaqqissuussinermi ingerlatsisut tassaapput Kalallit Røde Korsiat aamma peqatigiiffik Nanu, sinneqartoorutillu Nanup ingerlataanut, ilaatigut illoqarfinni tamani meeqqanut ornittagassanut, tutsinneqassapput
Nipersortarnermikkut tusaamasat Nunatsinneersut aamma Danmarkimeersut tapiissuteqarnerisa saniatigut aamma arfininngornermi allanik pisoqassaaq, tassalu atisanik aamma inuunermi ingerlariaatsimik takutitsinermik, kiinakkut qalipatsinnerit aamma meeqqat piginnaatitaaffii pillugit isiginnaartitsinermik ilaqassalluni. Tamakku saniatigut aammattaaq saqqummersitsinerit ingerlanneqassapput, soorlu "Politiit meeqqat qanilaarfigalugit", "Eqqumiitsuliat meeqqat qanilaarfigalugit" kiisalu atisanik atornikunik akikitsunik tuniniaaneq.
Kimmernaq - erinarsorluni peqataanermi saniatigut - aamma pisussanik saqqummiussisartuussaaq, taamaalillunilu ullumi tassani pisut ataqatigiississallugit Julie Berthelsenip aamma Søs Fengerip Nanu immikkut tapersersorlugu erinarsorneranni. Peqataasussat allat tassapput Juno, Nina aamma Malik.