Julie radiomi aallakaatitsissaassaaq

Januarip aallaqqaatani taamaatissaaq. Julie Berthelsen DR-p radiokkut aallakaatitassiaani nuannarineqarluartumi ‘Formiddag på 4’eren’-imi aallakaatitsissaassaaq.

Taanna aprilip qaammataani DR-imi aallartiinnarluni, sulinini radiokkullu aallakaatitseqataasarnissani ataatsikkoortissinnaanerlugit oqaatigisimavaa. Ukiaaneranilu taamaaliorsinnaannginnera ersarillivissimavoq.

- Unnuit tamangajaasa ulaperujussuartarpunga ullukkullu radiolerisarlunga, suliakkalu amerlavallaalersimallutik, Julie Berthelsen Sermitsiaq.AG-mut oqarpoq.

Anaanaq peqanngitsoq

Julie sapaatip-akunneranut 30 tiimit sulisassalluni DR isumaqatigiissuteqarfigisimavaa. Taassuma tusarnaartitsinernut, oqalugiarnernut saqqummersitsinernulli sapaatip-akunneranut nalunaaquttap akunneri 20-t 60-llu akornanni sulisarpoq. Ukiumilu nutaami ncd-mik nutaamik aamma saqqummersitsissamaarpoq.

- Allamukartuaannarnera meeqqanni malugisinnaalerakku, aliasuutigilaarsimavara.

Julie-lu aallakaatitsissaarniarluni eqqortumik aalajangersimalluni nalunngikkaluarlugu, ugguanngitsuunngilaq.

- Ajornaatsuinnaanngilaq, misilillugumi nuanneqaaq. Nuannarinerpaasaralu toqqartariaqarsimavara, tassa nipilersorneq.

Assigiikkaluarlutik allaaneq

‘Formiddag på 4’eren’ nipilersornernik, pulaartoqarnernik oqallinnernillu aallakaatitsisarnermigut, DR-imi nuannarineqarnersanut ilaavoq. Aallakaatitassiaq, Julie-p aallaakaatitseqatigisartagaa Kasper Harboe ilagalugu, ukiuni arlalinngortuni ingerlanneqarsimavoq. Taamaammat maajip qaammataani siullermeerluni aallakaatitsiartorami taanna nuannaarsimaqaaq.

- Misilinnikuusannut sanilliullugu assigungaluarluni allaaneruvoq.

- Toqqaannarnermimi qanorluunniit pisoqarsinnaanera, nalunngeqaara.

- Tusarnaartut qisuariaataat takusinnaannginnakku 'allaanerussutigaa'.