Juliep sms-ikkut taasinissat qilanaarai
Pisussaq fjernsynikkut takutinneqalerpat nunatsinniit Tele-Postiip, TV 2, KNR-ilu suleqatigalugit sms-ikkut taasisinnaanissaq periarfissaatilermagu Julie Berthelsen-imut AllStars-imilu erinarsortussaanut pingaaruteqaqaaq.
- Kalaallit Nunaanniit taasisinnaaneq uannut assorsuaq pingaaruteqarpoq – uangami Nuuk/Kalaallit Nunaat sinnerlugu peqataavunga, neriuppungalu Julie AllStars nunatsinniit tapersersorluarneqassasoq, Julie Berthelsen oqarpoq.
Sapaatiuppat nal. 16 erinarsoqattaarnerit aallartissapput, mobilillillu tamarmik, tassa GSM-illit Tusass-illillu, taasisinnaapput.
Tele-mit eqqaamaqquneqarpoq sms-imik nassiutinnginnermi +45 toortaqqaartariaqanngimmat. Isiginnaagassiap ingerlanerani ilitsersuussinerit malinneqaannassapput, tassa Danmark-imiittuusiinnassalluni.
SMS ataaseq 5 koruuneqassaaq + SMS-ernermut aki nalinginnaasoq, katillugillu qulingiluariarlutit taasisoqarsinnaavoq. 5 koruunimik akeqarnissaa TV 2-p aalajangingaraa, akilu taanna aamma Danmarkimi taasinernut atorneqassaaq.
SMS-ertut tamarmik uppernarsaammik nassitsivigineqartassapput.
- Nassitsisimanermut uppernarsaammik tigusaqanngikkaanni, Tusass-kontop imaarussimaneranik tamanna peqquteqarsinnaavoq. Taamaammat erinarsornerit aallartinnginneranni kontop imaqarnera misissoqqaartariaqassaaq: Saldo allallugu, taavalu 1800-imut nassiullugu, taava saldo-p imai paasissavatit. Sullissineq akeqanngilaq, Telemi Tusagassiinermut pisortaq Malînánguaq M. Mølgaard nalunaaruteqarpoq.
GSM-ilinnut sms-ikkut taasinernut akiligassat tullianik telefonimut akiligassami ersissapput ”VAS”-itut (Value Added Service) allassimallutik.