Juullimut tussiutit kattutsittarpaatigut
Jens Karl Brobergip juullimut tussiusiani atortarpai juulli alianaannerulersinniarlugu, ilaquttaminut innuttaaqatiminullu.
Juullimut nigaliliami paarnaqullunnik sanaami tipigissumi naneruutit aappaat ikinneqarsimavoq ullorissallu igalaani qaamapput. Silami illoqarfiup orpissua qangisooq kusanartorlu nillertumik anorlerfigitippoq. Illoqarfik tamarmi juullerpalaarpoq. Ukioq naajartorpoq qanittukkullu jullimi aliannaarsaartoqarlunilu peqatigiittoqassaaq.
Juullillu aamma ilagai juullimut tussiutit. 58-inik ukiulik Jens Karl Broberg, Qeqertarsuarmiu, nammineq juullimut tussiusiortarpoq erinniortarlugillu, ukiunilu kingullerni 20-ni erinarsoqatigiit Nikanaq siulersorsimavai. Ukiut tamaasa juulleriartornera erinarsoqatigiit nammineq juullimut tussiusiaminik pisoqqanik nutaanillu sungiusartarpai ukiumi pisussamut pingaarnermut – tassalu illoqarfiup oqaluffiani Naalakkatta Pilikkilivia-ni, Vor Herres Blækhus, juulliaqqami juullimut tusarnaartitsinissamut.
Taanna isumaqarpoq juullip tussiutai tamarmik innuttaaqatigiinni ilaqutariinnilu tamani immikkut illuinnartumik ataqatigiissitsisartut.
Ajoqimit isumassarsisinneqarpoq
Jens Karl Broberg piniartukkormiuni peroriartorsimavoq. Nipilersorneq erinarsornerlu ulluinnarni atugarisimanngilaat. Nuannarinerusimavaa angummi piniaqatigisarnera, qimussertartorujussuusimappullu. Pattannerli siusissukkut soqutigisarilerpaa, tassa ajaa ajoqimik ueqarsimammat pattagiartartumik. Taanna nuannaartorisimavaa isumassarsiorfigisartorujussuusimallugulu. Pattagiarli atoqqusaasimanngilaq, tamanikkunniillili nipilersornermik erinarsornermillu soqutiginnittorujussuanngorsimavoq.
Ukiorpassuit qaangiuttut, 21-nik ukioqarluni Danmarkimi lærlingiulluni, keyboardertaaqqaarpoq. Atornissaa sukkasuumik ilinniarpaa, pingaartissimavaali nuutinik atuarsinnaanissani, erinniornermut pikkorinnerulerusulluni. 34-nik ukioqarluni kiisami nuutinik atuarneq ilinnialerpaa,Qeqertarsuarmi atuakkanik atorniartarfimmi nuutinik ilinniummik atorluni. Soqutigisarilluinnagaanut aallarniutaasimavoq, inuunerani imaqartorujussuarmut. 1988-imi tussiusiortalerpoq erinniortalerlunilu. Taamanikkunniillu erinarsuutit tussiutillu erinalerlugit 165-it sanasimavai.
Juullimut tussiuterpassuit
Jens Karl Brobergip ilisimanngilaa juullimut tussiutit qassit sanasimanerlugit – sanaarpassuinilli amerlanerpaat juullimut ukiortaamullu tunngapput. Inuunerami nalliuttunut qanittuararsuarmik attuumassuteqarpoq.
- Juullimut tussiusiussagaangama pilersaarusiunngisaannarpunga. Erinnat namminneq takkukkajuttarput, taavalu erinaq allattarpara kingornalu taalliorlunga. Aammattaarli pingaartilluarpara ukiut tamaasa juullimut tussiutinik nutaanik sananissara, erinarsoqatigiiutinnullu saqqummiuttarpakka. Ukiakkut ilinniartarpavut taavalu juullimi ukiortaamiluunniit oqaluffimmi atortarlugit.
1988-imili februaarimi ullut ilaanni juullimut ukiortaamullu tussiusiaqqaava, Aqqutissat Nalunartut, Nunatsinni tussiutit attanneqarnersaasa ilisimaneqarnersaasalu ilagilersimavaat.
- Tussiut taanna ilisinerni nalliuttunilu atorneqarajuttarpoq. Erinarsoqatigiitsinnili ileqqorilersimavarput tamatigut ukiutoqqami oqaluffimmi atortarlugu. Tussiummik aalajangersimasumik nuannerinerpaasannik taasaqarsinnaanngilanga, pissanngatigaarali tussiut kingulleq qanoq tiguneqassanersoq. Taanna maanna erinarsoqatigiinni sungiusarparput, ukiumoortumik juullimut tusarnaartitsinermi atussallutigu.
Nikanaq
Jens Karl Brobergip erinarsoqatigiit Nikanaq 1992-imi pilersippai. Inunnik erinarsornermik nuannarisalinnik soqutiginnittunillu allagarsiilluni ujarlerpoq – inuillu arfineq marluk illuanut takkupput.
- Piffissaq sivisooq aatsaat ingerlareersoq immitsinnut piginnaasavut ilikkarpavut. Erinarsuut erinaalu ilinniassagaangatsigit tamatigut erinarsoqatigiit sisamanut avittarpakka, tamaasalu immikkut ilinniartillugit. Tamarmik erinarsuutip ilaa ilinniagartik kukkunagu erinarsorsinnaaleraangassuk aatsaat erinarsoqatigiit katersortarpakka – taamaattumik allaaneq ajorpoq katitertakkanik katiterilluni. Taamaattumik ilaannikkut tussiutit nutaarluinnaat akunnerit marluk inorlugit ilikkarsinnaasarpavut, taanna oqarpoq.
Sunngiffimmi ilarujussua Nikanaq-mut atortarpaa, erinarsoqatigiillu ukiassakkut juullimut tusarnaartitsinissamut sungiusalereertarput. Erinarsoqatigiilli aamma ilaqutariinnit pigineqalersimapput, tassa nulia qitornaallu inersimasut tamarmik erinarsoqataasarsimammata.
- Uagutsinnut pingaaruteqartorujussuuvoq erinarsoqatigiit ingerlattuaannarnissaat. Juullimi oqaluffimmi tussiareeraangatta utoqqaat illuanni utoqqaat aamma tussarsiarfigiartortarpavut. Ilaqutariinni tamatigut erinarsoqatigiittartorujussuusimavugut, isumaqarpungalu juullip tussiutaasa tamatta kattutsikkaatigut, innutaasut ilaqutariillu, taamatullu misigisimaneq nuannersuuvoq toqqissisimanartuullunilu, Jens Karl Broberg oqarpoq.
Una allaaserisaq AG-ip juullimi aviisiani akeqanngitsumik uani atuarsinnaavat pissarsiarisinnaallugulu: