Kalaaleq atuakkiortoq nersornaammut angisuumut innersuunneqarpoq
Naja Rosing-Asvid Nunat Avannarliit meeqqanut inuusuttunullu atuakkianut nersornaasiuttagaanut 2023-mi innersuunneqarpoq.
Nunanit avannarlernit atuakkat assiliartallit, meeqqanut atuakkat, inuusuttunut oqaluttualiat katillugit 14-t Nunat Avannarliit meeqqanut inuusuttunullu atuakkianut nersornaasiuttagaanut 2023-mi innersuunneqarput. Taakkunani kalaallisut atuagaq assiliartalik ilaavoq.
Tassa 'Pipa Sulullu qaangiipput' Naja Rosing-Asvidip atuakkiaa.
Illussanik titartaasartoq assilialiortartorlu 2012-miilli meeqqanut atuakkanik arlalinnik saqqummersitaqarsimasoq, nersornaammut angisuumut tassunga aappassaanik innersuunneqarpoq.
Innersuussinermut tunngavilersuinermi ilaatigut ima oqaasertalerneqarpoq:
- Naja Rosing-Asvidip atuartartut quianakujuttumik qulequttanik tamanit paasineqarsinnaasunik, soorlu isummereersimanermut aamma ”uagut taakkulu” pillugit eqqarsartarnermut aamma oqaaseqatigiinnani ikinngutigiinnermut tunngasunik oqaluttualiorpoq.
Oqariartuut pingaarutilik
Innersuussinermut tunngavilersuummi aamma oqaatigineqarpoq, atuakkap timmiaaqqat ilaqutariit assigiinngitsut marluk, tassa qupaloraarsuit orpimmiuttallu eqqaamioriinneranni ajornartorsiuteqarnerannik takutitsivoq.
Timmiaaqqat assigiittorujussuugaluartut, sullinernik assigiinnik nerisaqarlutik, assigiingajattumik qarlortarlutik, ilaqutariit taakku marluk akornanni ersinngitsumik killeqarpoq, pingaartumik inersimasortaat timmiaaqqat allat pillugit ajornerusunik isummereersimasarput. Inuttat pingaarnerit marluk Pipa Sulullu nalaatsorneriinnakkut peqatigiilerput, assigiittorujussuullutillu ikinngutigiissinnaallutillu paasiartulerpaat.
- Atuakkami oqariartuut taanna pingaaruteqarpoq. Oqaatsitigut unammilligassat, Kalaallit Nunaanni aamma nunani avannarlerni allani nalunngilagut – paaseqatigiinnissamullu sukataarnissaq qanoq pingaaruteqartiginersoq nalunngilarput – kisianni, assigiinngissuteqaraluarluni ikinngutigiittoqarsinnaavoq.
Nunatsinni Atuakkiortut Kattuffiata Naja Rosing-Asvid innersuunneqarnerani pilluaqquaa.
Nunat Avannarliit meeqqanut inuusuttunullu atuakkianut nersornaasiuttagaanut 2023-mi Oslomi 31. oktober nersornaasiisoqassaaq.
Nersornaaserneqartoq ”Arsarnerit” aamma 300.000 koruunit pissarsiarissavai.