Kalaaleq filmiliortartoq suliniuteqartorlu Pigeprisimut innersuunneqartoq
Aka Hansen, filmiliornermik suliaqartoq ilungersuutingisaminillu anguniagaqartartoq, Planbørnefondenip Pigepris 2023-mut nersornaaserneqarnissamut innersuunneqarpoq. Innersuunneqarneranut tunngavilersuutigineqarpoq kalaallit inuiaqatigiinnut isiginnittaatsip assigiinngisitaarnerulernissaannut annertuumik suliniuteqarnera.
Aningaasaateqarfiup Planbørnefondenip inuk, eqimattat imaluunniit peqatigiiffik Danmarkimi naligiinnerulernissamik suliniuteqartoq ukiut tamaasa Pigeprisimik nersornaasertarpaa.
Nersornaaserneqartussanut ukioq manna innersuunneqartuni pingasuusuni ataatseq Kalaallit Nunaannerpoq. Tassa Aka Hansen, filmiliornermik suliaqartoq anguniagaqarnermilu isummersortartoq innersuunneqartunut ilaavoq. Arnat angutillu naligiinnerulernissaannik suliniuteqarpoq, aammali danskit kalaallillu inuiaqatigiit akornanni naligiinnerulernissaannik suliaqarluni.
- Suliniuteqarninni erseqqissartarpara Kalaallit Nunaanni ileqquuginnartoq arnat isummeqataasinnaanerat. Arnat angutillu assigiimmik naleqartinneqarsimapput, tamattamilu inunngorpugut tunngavitsigut inuulluta, Aka Hansen innersuunneqarnermini oqaaseqarpoq.
Facebookimini Aka Hansen allappoq innersuunneqarneq maniguulluni akuerisimallugu, innersuunneqarnerlu angusaasoq annertooq.
Filmili oqalugiarnernilu
Aka Hansen pisuusaartitanik aamma piviusulersaarusianik filmiliortarpoq, taamatullu suliaqarnermini takutittarlugu nunatsinni ullumikkut pissutsit qanoq innersut. Ñunap inoqqaavisa pisinnaatitaaffii anguniagaqarnermini aamma oqaaseqarfigisarpai.
Saamit norskit naalakkersuisuisa tuttuuteqarfinni anorisaatinik piiaajumannginnerat pillugu Oslomi akerliussutsimik takutitsineranni peqataavoq, tapersersuinini aamma takutinniarlugu.
- Nunarsuaq maanna inuuffipput pillugu ilisimasat aamma isummersuutaasinnaasut siammarnissaannik anguniagaqarpunga. Arnat ikinnerussuteqartullu naqisimagaangatsigit, ilisimasat siunissami atorsinnaasagut matoortarpagut, Aka Hansen oqarpoq.
Nersornaat Pigeprisen novemberimi tunniunneqartarpoq, innersuunneqartut akornanni ajugaasussamik taasisinnaavutit Planbørnefondenip nittartagaani.