Kalaallisut oqaatsit ilinniartitaanermi pingaartinneqarnerusariaqarput
Ilinniarfinnut ingerlariaqqinnissami kalaallisut oqaatsitigut angusat salliutinneqarnerusinnaappat, inuusuttut amerlanerusut meeqqat atuarfianniit ilinniaqqiffinnut ingerlariaqqissinnaasunngorlugit? Apeqqut taanna ataatsimeersuarnerup ulluani siullermi oqallisigineqartunut ilaavoq.
- Ilinniartitaaneq ima aaqqissuussimavarput nunatsinni inuusuttut qallunaatut angusaat pitsaanngippata, nunatsinni ilinniarfinnut isernissaat ajornarluinnarsisillugu.
Kalaallisut oqaatsivut pillugit ataatsimeersuarnerup ulluisa siullianni, saqqummiisut ilaat, ilinniartitaanermut aqutsisoqarfimmi pisortaq, Kaali Olsen, taama oqaaseqarpoq.
Kalaallisut atuartitsineq kalaallisullu oqalulluni atuartitsineq meeqqat atuarfianni nukittorsarniarlugu suliniuteqartoqarnerata nalaani, nunatsinni ilinniaqqiffinnut amerlanernut qinnuteqarnissamut qallunaatut angusat aalajangersimasumik pitsaassuseqartariaqarput, inuusuttoq ilinniaqqinnissamut akuerisaanissamik naatsorsuuteqassaguni.
- Ilinniartitaanermi piumasaqaatit allanngortinneqarsinnaanerlutik peqataatitsinerulerluta, mattussinerunata? Ilikkagaqartarpugut peqataanikkut, akuutinneqarnikkut. Ilikkagaqarnavianngilagut peqataatinneqanngikkutta, oqarpoq.
Ilinniaqqiffinni qallunaatut ilinniartitsineq
Taama oqariartuuteqarneq ataatsimeersuarnermi peqataasut ilaannit, ilinniartitaanermut naalakkersuisoqarfimmi immikkoortortaqarfimmi pisortamit, Dorthe Bidstrupimit qisuariarfigineqarpoq. Taassuma naqissuserpaa Ilulissani perorsaanermik ilinniarfimmi ilinniakkat arlallit kalaallisuinnaq atuartinneqarluni naammassineqarsinnaasut.
Piviusulli ilaat imaapput, nunatsinni ilinniaqqissagaanni qallunaatut oqaaseqarsinnaanissaq piumasaqaataalluni. Kaali Olsenip assersuutigaa ilisimasaqarluni inuusuttoq sanasunngorniarnissamik nunatsinni qinnuteqarami ilinniarfigisassaminik nassaarsinnaasimanngitsoq qallunaatut oqalussinnaanera naammaginanngimmat. Taannali Danmarkimi ilinniarfissaminik nassaarsimavoq, oqaatsit qallunaatuut atorsinnaasaasa killeqarnerat aporfiginagu.
Naalakkersuisoq nassueruteqartoq
Ilinniartitaanermut, kultureqarnermut, timersornermut ilageeqarnermullu Naalakkersuisoq, Peter P. Olsen "Oqaatsitta atugaaneranni ilinniartitsissutaanerannilu anguniakkat najoqqutallu"-mut pingasunngornermi sisamanngornermilu qaaqqusisuuvoq. Kalaallisut oqaatsit nukittorsarnissaannut suliniutit pillugit eqqarsaatissinneqarpoq, aammali qallunaatut oqaatsit ilinniartitaanermi salliutinneqarnerat pillugu eqqarsaatissinneqarluni. Ataatsimeersuartut inassuteqaatissaat maanna utaqqimaarpai:
- Kalaallisut oqaatsitta atuartitsissutigineqarnerisa pitsaassusaat misissussallugu inissaminiippoq, Ilinniarfissuaq tassuuna peqataatinneqartariaqassaaq. Oqaatsigut pillugit suliaqarnermi oqartussat suliaqartullu tamassumunnga attuumassuteqartut peqataatinnissaat pingaartippara, inassuteqaatissallu qilanaaraakka, Naalakkersuisoq Peter P. Olsen oqarpoq.
Kalaallisut oqaatsitta atajuarnissaat ineriartortinnissaallu pillugit inassuteqaatit ataatsimeersuarnermi peqataasunit 100-ngajannit tunniunneqarnissaat naatsorsuutigineqarpoq.