Kalaallit eqqumiitsuliortuisa siulliit ilaata suliai Nuummi saqqummersinneqalersut
Ukioq manna Aalut Kangermiup inunngorneranit ukiut 200-nngussapput. Tassunga atatillugu Nuummi Eqqumiitsulianik Saqqummersitsivimmi Aalut Kangermiup qalipagai 50-it saqqummersinneqalerput.
Eqqumiitsuliat 1822-imiit 1869-ip tungaanut suliarneqarsimasut Nuummi Eqqumiitsulianik Saqqummersitsivimmi februaarip 17-ianiit maajip 29-ata tungaanut takuneqasinnaasapput.
- Aalummit kingornussat Kalaallit Nunaanni eqqumiitsuliornermi suli ullumikkumut takussaasarput, allaallu nittartakkatigut attaveqatigiittarfinni aamma takussaasarlutik. Erniinnartumik periuseqarnerata inuttaliarisartagaasalu takuminarnerisa eqqumiitsuliai silarsuarmi tamani inunnut tamanut paasiuminartunngorsimapput, tikikkuminassuseqarlutillu.
- Aalup suliarisimasai 350-it ilismaneqarput, uanilu saqqummersitsinermi imilertakkamik qalipagai 50-it takutinneqarput. Taakku saniatigut qisummut kigartukkanit sananeqaqqaarsimaneranit naqiteqqitat arfinillit takutinneqarlutik, Nuummi Eqqumiitsulianik Saqqummersitsisarfik paasissutissiivoq.
Eqqumiitsulianik europameersunik isumassarsisitaasarpoq
Aalut Kangermiup suliai inuiaqatigiinnit maluginiarneqalerpugut aviisi Atuagagdliutit aqqutigalugu. Aviisimik pilersitsisoq, Heinrich Rink, 1858-imi aviisitigut allagarsiilluni tamanik kajumissaarivoq kalaallit oqalualaarutaannik oqaluttuaannilu kalaallinulluunniit atuaruminartunik aliikkusersuutaasinnaasunik saqqummersitsisoqartarnissaa.
- Imilertakkanik qalipakkat, naqitikkat, titartakkat, allakkallu aqqutigalugit piniartarneq, kulturit naapinneri, ulluinnarni inuuneq, pinngortitaq, illup iluani pisattat allallu oqaluttuarisimavai. Aalut inuusimavoq oqaluttuarisaanermi immikkut soqutiginaatilik. Inuunerata nalaani Kalaallit Nunaanni marloqiusaanerit atuuttut nammineq pigisimavai, Nuummi Eqqumiitsulianik Saqqummersitsisarfik tusagassiuutinut nalunaarummi taama allappoq.
Aalut Kangermiut piniartuusimavoq Nuummilu Qatanngutigiinniat ataanni ajoqiusimalluni. Taamani kalaallisut atuarsinnaasut allassinnaasullu ikitsuinnaat ilagisimavaat
Aalut nunarput kisiat isumassarsiorfigineq ajorsimavaa eqqumiitsuliat nunanit allaneersut aamma isumassarsiorfigisarsimavai. Rinki aqqutigalugu Aaluup qisummik kigartuilluni eqqumiitsulioriaaseq ilisimalersimavaa.
- Aaluup titartakkani nammineq qisummut kigartuganngortarsimavai, ilaatigullu allat titartagai kigartugarisarsimallugit, akerlianillu, Aaluup titartagai allanit kigartuganngorneqartarsimallutik, soorlu Nuummiumit Marcus Lyngemit suliarineqartarsimallutik. Nuummi Eqqumiitsuliani Saqqummersitsivik allappoq.
Aalut Kangermiup eqqumiitsuliai februaarip 17-iani nalunaaqutaq 17.00-imiit maajip naanerata tungaanut Nuummi Eqqumiitsulianik Saqqummersitsivimmi takuneqarsinnaasapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...