Kalaallit Illuutaanni iluatsilluartut
Tallimanngormat Kulturip Unnuaanut atatillugu Kalaallit Illuutaannut alakkaasut 2000-it missaanniinnissaat ilimasuutigineqarsimavoq. Ilimasuutilli qaangerluarneqarput, illup nalunaaquttap akunnerini sisamani tamanut ammatinneqarnerani alakkaasut 2203-usimammata.
Løvstrædemi erfalasulerfiup Kalaallit Illuutaata isaariaata qulaaniittup allunaasartaa tallimanngormat nalunaaqutaq unnukkut arfininnguutileraa erfalasulerfimmit uingasumik inissisimasumit nivingaannalerluni uumisaarilersimagaluarpoq
Angutip ataatsip aqquserngup assiaqutaaniittut qusuk takusooq tigoriarlugu erfalasulerfiup allunaasartaa kaanngartinniarsaraa, angutip allap erfalasulerfiup eqqaani igalaaniittup allunaasaq tigusinnaalerniassammagu, taamaalilluni allunaasaq qilersinnaalerluni erfalasorlu amuneqarsinnaalerluni.
Oqaannarluni ajornaqaaq, Løvstrædemilu alutorsaatigineqarluavippoq. Inuit 30-40-t missaanniittut erfalasulerfiup allunaasartaata erfalasulerfimmut inisseqqinniarneqarnera niaqqutik malartilluavillugit malinnaavigaat.
Kiisami iluatsimmat inuit nuannaajummerlutik palaapput, kalaallit erfalasuat amuneqarluni isaarissap qulaani erfalarusaaleratarpoq. Aaatsaat taamaalimmat matut inunnut ammarneqarput, Unnuk kulturisiornermut atatillugu kalaallit illuutaata inuit qinigassaqartilluarlugit aaqqissuussisimavoq.
– Tuppallernaqaaq. Alakkaasut 2000-it missaanniinnissaat neriuutigisimavarput, anguneqarsimanngikkaluarpatalu pakatsisimassagaluarpugut, Vivi Kielsen unnuk taanna ilisarititsisuusoq oqaluttuarpoq.
Vivip oqaluttuaraa inuit 2203-t illumut alakkaasimasut, isumaqarlunilu unnuk eqissisimasumik torersumillu ingerlasimasoq, naak inuppassuit illuap iluaniillutillu aneerasaarfimmiikkaluartut:
– Kassuminersuaq amigaatigaarput, maanga assartuussinnaasimannginnatsigu. Aalborgimiit Københavnimut sponsorissaarukkatta. Uggornalaarpoq, taannami arlalissuit takusarsimagaluaramikkut. Neriuutigaarput decembarip 20-ani maangaatitissinnaassallutigu, taamanikkussamut juullimut niuffatsitsissagatta. Aareersimassanngippat imaanulluunniit iginnarneqarsimassanngippat, Vivi illariaatigivoq, aamma isumaqarpoq unnuk kulturisiorfik taanna taamaattuni aatsaat taamak nillertigitillugu misigigini.
– Aap, nunarsuup silaannaa kissatsikkiartortoq oqaluuserineqarpoq, maanilu Danmarkimi Unnuk Kulturisiorfik ASSUT qiianarpoq. Ajortoqarpoq, Vivi tupigutsassimaartoq oqarpoq, aamma utoqqatsissutigaa tuttunik suppaliaq nittasaanneqarsimasoq Unnuk Kulturisiorfiup aallartinneraniit 1 tiimiunngitsorluunniit nungummat.
Paasisinnaanngilara anginerusumik suppiliortoqarsimanngimmat. Assorsuaq uggornarpoq, tassami aamma kissassaatigisinnaagaluaratsigut. Atagu tullissaanut immaqa pitsaanerutissinnaagipput, Vivi Nielsen neriorsuivoq.
Vivi isumaqarpoq, programi oqalugiarnermik, atisanik takutitsinermik, filmertitsinermik, nipilersornermik erinarsoqatigiinnillu tusarnaartitsinermik imaqartinneqartoq inuit illumukaanerannut iluaqutaasimasoq.
– Init tamarmik ulikkaavipppput, Isak Kleistip filmimik takutitsinerani, filmi piviusulersaarut Bertrand Lozay-mit, oqaluppalaanik Kasper Sørensenip oqaluttuarnera aamma isiginnaartitsisartup Vigga Bro-p oqaluttuaa unnuk inuppassuarnut alutornartunngortippaat.
– Pingaartumik Vigga Bro alutornarpoq. Puiseerannguaq arnaviaq inequnartoq. Assut pikorippoq, Vivi isumaqarpoq, aamma unnuk ataatsimut isigalugu assorsuaq iluatsissimanerarpaa:
– Unnuk Kulturisiorfimmi siornatigut taamak inoqartiginngisaanarsimavugut, taamaattumik angusaq assorsuaq kusanarpoq, Vivi Nielsen oqarpoq.