Kalaallit Illuutaanni "Sermeq Iminngortoq"
Nunani avannarlerni eqqumiitsuliortut 11-it Kalaallit Illuutaanni ataatsimut saqqummersitsipput taallugu: SMELTEVAND, tassanilu kalaallit eqqumiitsuliortut marluk peqataapput
Kulturikkut taarseeqatigiinnissamik isumassarsiaq tamanna pilersimavoq ilinniagaqarluni Islandimiinnerup nalaani. Tamatuma kingorna eqqumiitsuliortut imminnut attaveqaqatigiissimapput najoqqutassarlu ineriartortillugu. Eqqumiitsuliamikkut namminneq nunamik killeqarfii qaangerlugit isaassiniarput, oqaloqatiginnikkusullutik aammalu eqqumiitsuliornikkut kulturikkullu misigisaminnik taarseeqatigiinniarlutik. Taamatut taarseeqatigiinnikkut nunani avannarlerni kinaassutsivut sammineqalissapput, annertunerusumillu ilisimasaqartitsilerlunilu qassiiunerussuteqalersitsilluni. Tamanna peqatigalugu sammitinniarpaat nunarsuaq allanngorartuusoq, tamattalu ineriartornermut, ukiuni makkunani sammineqaleraluttuinnartumut, tassalu silap allanngorarneranut, peqataasugut sammitinniarlugu. Tamatumuuna kissaatigaat eqqumiitsuliorneq pissutissamisoortumik oqallinnermut peqataassasoq, tassa ukiuni makkunani sumut ingerlanersugut, inuuniarnermi atugassarisat allanngorarneranni silap allanngoriartornera ilutigalugu, Københavnimi Kalaallit Illuutaat nalunaarpoq.
Saqqummersitsineq ingerlassaaq septemberip 24-ianniit novemberip 2-ata tungaanut.
Camilla Nielsen aamma Nuka K. Godtfredsen nunatsinnit peqataapput.