Kalaallit isiginnaagassiaat Det Kgl. Teaterimi iluatsittoq
NALILIINEQ: Makka Kleist aamma Svenn Syrin angakkutut ajoqersuiartortutullu Hans Egedetut pitsassuupput. Qilanaarit. Isiginnaagassiaq ukioq manna kingusinnerusukkut Kalaallit Nunaanni takutinneqassaaq.
Danmarkimi ataasinngornermi januaarip 17-anni isiginnaartitsisarfiit corona pissutigalugu matoqqanerup kingorna ammaqqimmata, Det Kgl. Teaterip isiginnaartitsisarfiani paarlersuarni pissangasoqarpoq. Isiginnaartitsisarfiup initaa mikineq ulikkaarluinnarpoq – isiginnaartut 100-nit amerlanerusut qilanaartut – kalaallit isiginnaagassiaat allataq nutaarluinnaq danskit nuna tamakkerlugu isiginnaartitsisarfianni, siullermeerluni takutinneqalermat katersuupput.
Aviisi AG taama allappoq.
Unnummi inuttaasut pingaarnerit tassaapput kalaallit isiginnaartitsisartuini »grand old lady« (misilittagartooq), Makka Kleist uialu Norgemiu Svenn Syrin. Taakku ukiorpassuarni isiginnaartitsisartuupput – marluullutillu Nunatta Isiginnaartitsisarfianik pilersitseqataasuupput, aallartinnerani Svenn isiginnaartitsisarfimmi pisortatut, Makkalu Isiginnaartitsinermik Ilinniarfimmi pisortatut.
Taakku marluullutik ataasinngornermi unnukkut Makka Kleistip isiginnaagassiaat »Præsten og Åndemaneren« (Palasi Angakkorlu) siullermiivissumik takutippaat, taassumalu kingorna Makkap kisimiilluni isiginnaartitsilluni »Udsigten« (Isikkivik), Kalaallit Nunaanni Danmarkimilu siornatigut takuteriikkani isiginnaartitsissutigaa.
Isiginnaagassiat marluk imminnut tulluarluinnartut. Siullermik ukiunik 300-nik kingumut qiviarneq – Hans Egedep siullermeerluni kalaallinik naapitsinera. Tamatumalu kingorna ullutsinni Blok 5-imut pulaarneq, tassani arnap utoqqaap nunaqarfimmit illoqarfissuarmut pinngitsaalisaalluni nuutsinneqarnerup kingorna inuusuttuunermit eqqaamasalikkersaarpoq.
Kulturimik annaasaqarneq – kisianni aamma erngup kuuffiani imeq kissartoq nillertorlu tipaatsuutigalugit. Isiginnaagassiat marluk sammisap ataatsip illua-tungeriinnerisut ipput.
Aviisimi AG-mi atuarnerusinnaavutit. Aviisi uani pissarsiariuk: