Kalaallit nipilersortartut arlallit Nunavummi tusarnaartitsissasut
Kalaallit nipilersortartut eqqumiitsuliortullu Iqalunni festivali qaammammi matumani pisussaq peqataaffigissavaat.
Alianait Arts Festival juunip 30-aniit juulip pingajuata tungaanut Nunavummi illoqarfiit pingaarnersaanni, Iqaluit, ingerlanneqassaaq.
Kalaallit eqqumiitsuliortut arlallit festivalip aallartinneqarnissaanut piareersimapput.
Kalaaleq nipilersortartoq, Anda Otto Schmidt, nipilersortartutut Andachan-imik taaguutilik, festivalimi tusarnaartitsinissamut qilanaarpoq.
Rappertartunik suleqateqassasoq
- Nunavummi rappertartut suleqatigalugit festivalimi tusarnaartitsissaagut. Rappertartunut ingerlatsisuussaanga aamma beatsinik suliaqassaanga, kingusinnerusukkullu kisimiillunga tusarnaartitsissallunga, taanna Sermitsiaq.AG-mut oqarpoq.
Sisimiuni Arctic Sounds ingerlanneqarmat rappertartunik nipilersoqateqarsimavoq.
- Nuannissaqaaq, siullermeerlungalu Nunavummiissaanga. Festivalimut qilanaartupilussuuvunga, pingaartumik kalaallit eqqumiitsuliortut arlallit peqataasussaammata. Qularinngilaralu Nunavummi eqqumiitsuliortunut allanut atassuteqarnerulerumaarluta, Anda Otto Schmidt nuusiarsuani 'Visualize Happiness' pillugu Nunat Avannarliit siunnersuisoqatigiivisa nipilersortartunut nersornaasiuttagaannik nersornaaserneqarnissamut 2022-mi innersuunneqarsimasoq oqarpoq.
Festivali aalakoornartortalinnik imigassartaqanngitsoq
Alianait Arts Festival ukiumoortumk ingerlanneqartartoq ilaqutariinnut naleqqussagaallunilu imigassanik aalakoornartortalinnik atuiffiusanngilaq, aamma nutaaliorsinnaaneq, peqqissumik inooriaaseqarneq kulturikkullu takusassiat ileqquusut siuarsarniarlugit Iqalunni atuarfiit kattuffiillu qanimut suleqatigineqartarput.
Kalaallit eqqumiitsuliortut festivalimi takutitsisussat ilagaat Kimmernaq, Da Bartali Crew, Jenseeraq X Uummatit aamma Uyarakq.
Festivalimi nipilersortoqarnerata saniatigut filmertitsisoqassaaq, oqaluttuartoqassaaq, eqqumiitsuliortoqassaaq, qititsitsisoqassaaq, isiginnaartitsisoqassaaq assilialiortoqarlunilu.
Kalaallit peqataasussat Nuummiit Iqalunnut juunip 29-ani timmisartumut attartukkamut ilaallutik aallassapput.